Par “Osvaldu” i festivalu byušonu

Par “Osvaldu” i festivalu byušonu

Byus tys, kas puorsavierss – tai puorfrazejūt gribīs saceit par leluokū muzykalū nūtikšonu bejušuo Bolvu rajona teritorejā, par muzykys festivalu „Osvalds”. Itūgod festivals svieteja sovu 18. reizi, nu dīvamžāļ juoatzeist, ka koč kur pazuduse tei spūzme, ar kurū kaidu šaļti festivals mirdzieja kai leluokais muzykys festivals Latgolā.

Pyrmū reizi „Osvalds” nūtyka tuolajā 1995. godā i ilgu laiku rajona cylvākim itys beja leluokuo goda nūtikšona, kurys beletim laiceigi tyka kruota nauda, i vaicuojums „Brauksi iz „Osvaldu”?” beja vosorys golvonais vaicuojums. Vysa Latveja, pasasokūt „Osvaldam” zynuoja, kur ir Baļtinova. Tei ir tei vīta, kur ir bejuši daže „Boney M”! Vīnu godu tei slavanuo krīze ari skuore festivala nūtikšonu, nu vys tik piec nalelys pauzis „Osvalds” atsagrīze i 2013. godā beja jau trešū godu nu vītys.

„Osvalds” tradicionali nav viņ vīna muzykaluo skotuve – kai kuorteigā festivalā tuos ir vairuokys. Itūgod sabraukušī varēja atrost sev interesejūšu muzyku pi kaidys nu treju īspieju – tradicionaluos skotuvis, jaunuos muzykys skotuvis i elektroniskuos muzykys skotuvis – izklaidis īspiejis kai vacuokom, tai jaunuokom paaudzem. Iz tradicionaluos muzykys skotuvis uzastuoja balu muzykanti, populari dzīduotuoji i bejušuo rajona muzykanti: gitarists „Greg”, Laicānu saime, grupa „Muiža”, Rikardions, Nikolajs Puzikovs, Jurs Ķirsons nu grupys „Otto”, „Karburators” i „Ginc i Es”. Tradicionaluos skotuvis programmu vadeja Latvejis Radejis 2. programys DJ Aivis. Jaunuos muzykys skotuvis vadeituojs beja grupys „Borowa Mc” līders Aigars Runčis i iz tuos uzastuoja grupys „Elektrolīts”, „Neon Saturdays”, „Sovvaļnīks”, „Krampis”, „Peec Lietus”, kai ari reperi Ozols i Nātre. Tys, kas „Osvaldu” padora eipašu ari Latgolys kontekstā – ite nikod nateik damiersts ari par vītejom grupom, kas dzīd latgaliski. Tuos ir naatjemama festivala sastuovdaļa. Taipat jaunuos muzykys skotuve ir eipaša, ka ite teik raudzeit dūt īspieju vītejom jaunajom grupom, kai ari atvest iz itū Latvejis paksi ari grupys, kurys cytaiž varbyut nasaītu redzēt. Pi elektroniskuos muzykys skotuvis doncuotgrybātuojus prīcieja dīdžeju Mārtiņa Kreiļa, DJ Čivix, DJ Barik, DJ Andre White, DJ Trump i DJ POsitive lyktuo muzyka.

Apsarunojūt ar Aigaru Runči par tū, kas jam ir „Osvalds”, kurymā, koč ari Bolvūs, vys tik suocēs ari „Borowa Mc” ceļš, juo secynuojums beja, ka eisti vaira nav tys, koč kas ir pasamainejs i pyrmuo sovaiduokuo līta ir nu Kuorsovys nūasfaļtētais ceļš, kas nas jūceigu sajiutu, ka braukšona nimoz nav iz Baļtinovu, iz „Osvaldu”.

Cytaiž itūgod varieja gribēt vaira ļaužu kai skateituoju i doncuotuoju, nu koč kai pādejuos vosoruos kotrā nedelis golā teik saplanavuots tik daudzi nūtikšonu, ka ari tymā dīnā Baļtinovai vīnkuorši napasaveice – Vileks 720. jubileja svātki, Ludzys i Olyuksna svātki beja vītys, ar kurom vajadzieja pasadaleit.

Golā gribīs saceit paļdis i vysu leluokū cīnu veļteit festivala golvanajam organizatoram Mārim Lāpānam, kas dora i uztur itū Zīmeļlatgolys tradicionalū nūtikšonu dzeivu, ka ari ite „pi myusu” nūteik koč kas muzykali vaira kai kaids koncerts, zaļumbals ci piļsātys svātki, ka ir vasals festivals. Tik nu sirds juocar, ka „Osvalds” byus ari cytu godu, ka drupeit koč kū izadūs pamaineit festivala koncepcejā, kab otkon varātu spaituot kai seņuok!

Pīraksteja i fotografieja Edeite Husare

Elektrolīts

Osvalds 2013 (9 of 175)
Neon Saturdays
Osvalds 2013 (20 of 175)
Laicānu saime
Osvalds 2013 (36 of 175)Aigars Runčis i konkursa dalineica
Osvalds 2013 (57 of 175)Peec Lietus
Osvalds 2013 (68 of 175)Peec Lietus
Osvalds 2013 (82 of 175)Aigars Runčis i konkursa dalinīki
Osvalds 2013 (84 of 175)Tradicionaluos muzykys skotuve
Osvalds 2013 (100 of 175)Elektroniskuos muzykys skotuve
Osvalds 2013 (108 of 175)Artūrs Morozs, Ūzuls i Nuotre
Osvalds 2013 (111 of 175)Sovvaļnīks
Osvalds 2013 (134 of 175)Ginc un Es
Osvalds 2013 (139 of 175)Krampis
Osvalds 2013 (163 of 175)Karburators
Osvalds 2013 (167 of 175)Daiņs Paeglis /Krampis
Osvalds 2013 (171 of 175)
KRAMPIS

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]