Eiropys sadarbeibys dīnai par gūdu itūgod Lītovys Republikys Īkšlītu ministrejis dybynuotuo vaļsts īstuode Apvīnuotais tehniskais sekretariats i Viļnis kinoteatris „Pasaka” reikoj eiskinu konkursu  kai izaicynuojumu – voi var radeit muokslys kinu par kaidu nu ES finansātim projektim? Tī ir projekti, kurus kūpeigi eistynoj Lītovys, Latvejis, Pūlejis i Boltkrīvejis organizacejis.

Latveju nu Rēzeknis itymā konkursā puorstuov Latgolys entuziastu grupa „Biļdis” ar izveiduotū eiskinu par Rēzeknē, Grodņā (Boltkrīveja), Kedaiņūs (Lītova) kūpeigi realizātū projektu „Virtuālā pagātne – muzeju nākotne” (The Virtual Past is a Keystone for the Future of Museums). Eiskinā ir stuosts par tikšonu Latgolys muola varā.

Par eiskinu „Muola varā” var bolsuot leidz 20. septembrim vītnē youtube, nūspīžūt „Patīk” (Like). Kinys vērtēs ari kompetenta žūreja.

Ziņu sagataveja: LaKuGa piec Latgolys entuziastu grupys „Biļdis” snīgtuos informacejis
Karteņa: ekranšuovīņs nu eiskinys