Folklorys vuokumus konkursam „Apleicīne 3” var īsnīgt leidz 30. novembrim

Folklorys vuokumus konkursam „Apleicīne 3” var īsnīgt leidz 30. novembrim

Da 2013. goda 30. novembrim var īsnīgt Latgolys folklorys vuokumus konkursam „Apleicīne 3”. Konkursa mierkis ir apzynuot i atbaļsteit Latgolys nūvoda cylvākus, kas vuoc, poularizej i sagloboj Latgolys folkloru sevkurā izpausmē, taidā veidā turpynojūt O. Slišāna īsuoktuos tradicejis i organizejūt folklorys vuokuma konkursu „Apleicīne”.

Konkursa aizdavumi ir

– rūsynuot Latgolys lokaluos kulturvidis pietnīku sistematizātu darbeibu sova nūvoda vierteibu apzynuošonai, pīrakstiešonai, puormontuošonai, latgaliskos pašapziņas styprynuošonai;
– apzynuot tūs cylvākus, kuri Latgolā vuoc folkloru;
– popularizēt Latgolys namaterialū kulturas montuojumu sova nūvoda ļaudim i puornūvodnīkim;
– lobuokūs dorbus publicēt balvurcb.lv/kb i cytūs izdavumūs.

Konkursu organizej Bolvu Centraluo biblioteka sadarbeibā ar Bolvu nūvoda pošvaļdeibu i Viļakys nūvoda dūmi, Rēzeknis Augstškolys Humanitarūs zynuotņu katedru i SIA „Latgales reģionālā televīzija”.

Pīsadaleit konkursā var sevkurs Latvejis īdzeivuotuojs, kas vuoc Latgolys nūvodu folkloru, sevkurs Latvejis īdzeivuotuojs, kurs savuocs sovys dzymtuos apleicīnis ci kaidys cytys Latgolys vītys eipatnejū, lokalū folklorys kluostu. Konkursā teik īskaiteiti tī dalinīki, kuri vierteišonai pīduovoj vysmoz 5 puosokys ci 20 tautys dzīsmis, ci 10 garuos dzīsmis, ci 10–20 eisuos folklorys vīneibys, ci cytys lokaluos folklorys izpausmis, pīmāram, vīnys vītys tradiceju aprokstu vārā jamamā apjūmā.

Dorbi juoisnīdz datorsalykumā ci ar rūku raksteiti, bet skaidri salosami Bolvu Centralajā bibliotekā, Bolvūs, Tirgus ielā 7, LV-4501 leidz 30. novembrim (posta zeimūgs 25. novembris). Īsnādzūt dorbus konkursam, juonūroda sova adrese, e-posta adrese ci telefona numeri ci cyta informaceja, lai organizatori var ar kotru dalinīku vīgli sasazynuot.

Viertiešona. Kai konkursa cīneigs vuokums teik skaiteits itaids lokaluos folklorys vuokums:
– kas nav publicāts leluokajūs folklorys izdavumūs,
– kaidā konkretā pogostā ci cīmā pīraksteits folklorys vuokums, ci kaida konkreta cylvāka goreiguo montuojuma pīroksts,
– saturūšs zinis par teicieju,
– vuokums īsnīgts originalvolūdā.

Konkursa dorbus viertej organizatoru kūpeigi izveidota vierteišonys komiseja:
Andris Kazinovskis, Bolvu nūvoda dūmes prīkšsādātuojs, komisejas gūda prīkšsādātuojs,
Andris Slišāns, Upītes tautas noma vadietuojs, Ilga Šuplinska, Dr.phil. Rēzeknis Augstškolys asociātuo profesore, Anna Rancāne, dzejneica, Latgolys regionaluos televizejs ziņu dīnasta vadietuoja.
Nūslāguma pasuokums nūtiks Bolvūs Ontona Slišāna dzimšonas dīnā 28. decembrī (voi tyvu tam). Konkursa naudys bolvu fonds veidoj Ls 600. Tī ir Bolvu nūvoda pošvaļdeibys, Vileks nūvoda dūmis i nu Latgolys kulturys projektu konkursa ( VKKF) sajimtī leidzekli.

Seikuoku informaceju par konkursu var dabuot, sasazynojūt ar Rutu Cibuli: 64522168, 29213768.

Karteņa: E. Husaris p. arhivs

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]