Kai jau LaKuGa ziņuoja, Latgolys entuziastu grupys BIĻDIS veiduotuo kina „Vīna vosora deļ vysu” izguojuse CD formatā. Nu ir īspieja Latgolā kinu nūsavērt iz leluo ekrana.

10. novembrī Bierzgalis Kulturys nomā 11:00
11. novembrī Bierzpiļs Saīta nomā 14:00
14. novembrī Aglyunys Kulturys centrā 18:00

Kina „Vīna vosora deļ vysu” ir myusu dīnu drama, kas stuosta par vīnkuoršu latgalīšu saimi, taidu pošu kai daudzejis niu Latgolā i Latvejā. Kinys varūņus skuoruse itam laikam tik īrostuo i tik suopeiguo problema – izceļuošona iz uorzemem, aizīšona nu dzymtuos sātys i saimis. Nazkod tyvu cylvāku dzeivis vaira nikod naīs pa vacam, atškierteibys laikā kotram ir izaveiduojuse sova pīredze i dzymušys sovys vajadzeibys i sovys nuokūtnis cereibys. Kinys centrā ir palicieju i aizbraucieju sasatikšona Latgolys sātā, tei ir atškireigu pīredžu i vajadzeibu sasadūršona. Kotram ir sova dzeive i sovs redzīņs iz lītom, tok, kab varātu sadzeivuot, ir juopījem cytu cylvāku izvēlis i tys par reizis nimoz nav tik vīglai i izdorams. Kotram sova dzeive, tik vosora deļ vysu vīna – laiks, kod raudzeit sasatikt i naizaškiert iz myužu.

Ziņu sagataveja: LaKuGa piec BIĻDIS informacejis
Karteņa: BIĻDIS publicitatis foto