Grupa „Bez PVN” aicynoj iz 10 godu jubilejam veļteitajim koncertim

Grupa „Bez PVN” aicynoj iz 10 godu jubilejam veļteitajim koncertim
27. decembrī sovu 10. godadīnu svieteis grupa „Bez PVN”, deļ tuo, atguodojūt pyrmū koncertu Kuorsovys kulturys nomā, grupa aicynoj iz jubilejam veļteitajim koncertim vairuokuos Latvejis piļsātuos – Daugavpilī, Rēzeknē, Jelgovā, Reigā i Kuorsovā.

Latgalīšim, jo eipaši Latgolys jaunīšim i jaunajim muzikim, grupa „Bez PVN” ir bejuse īdvasmys olūts i latgaliskuo nesieji daudzu godu garumā. Jī ir vīnu nu Latgolys modernuos muzykys aizsuociejim, pīruodejuši, ka muzyka latgaliski var byut myusdīneiga, moderna i na tik šlagera stilā i tautysdzīsmēs. „Bez PVN” taipat kai pyrma 10 godim palykuši izticeigi sauklim „Mes dzīžam taidā volūdā, kaidā dūmojam!”

Grupys stabilais pamats vysus godus ir bruoli Guntis i Kristaps Rasimi. Gunti Latveja īpazyna kai „Fabrikys muzykaluo teatra” dalinīku daGunchi. Itūšaļt jis ir Rēzeknis nūvoda jaunatnis lītu specialists, nūvoda dūmis deputats, taipat laika gaitā pīsadalejs ari cytūs TV projektūs, nūdybynuojis producentu grupu, izdūdūt latgalīšu muzykys albumus i eistynojūt ar Latgolys kulturu saisteitus projektus, ir Latgalīšu kulturys Goda bolvys „Boņuks” idejiskais tāvs i reikuotuojs pīcu godu garumā. Kristaps klivs par diplomātu akteri, spieliejs iz Dailis teatra skotuvis dielim, pīsadalejs dažaiduos naatkareigajūs teatra projektūs, niu vaira teik atpazeits kai Jezups nu seriala „UgunsGrēks”, nu juo ituos šaļts leluokais izaicynuojums ir teatra muzykys komponiešona. Izruodis ar Kristapa muzyku īstudātys Dailis, Nacionalajā, Reigys Krīvu dramys i Valmīrys teatrus, kai teatra muzykys autors bejs nomināts „Spēlmaņu nakts” bolvai.

Itūšaļt grupā dorbojas ari Valdis Vucāns (basgitara), Jurs Vucāns (tausteni, samplers) i tuolkā īt Normans Bārbals, kas zynomuoks kai grupys „Momend” bundzinīks, bet grupys atteisteibā sovu rūku pi muzykys instrumentim dalykuši ari bundzinīki Pīters Orinskis i Artūrs Morozs, basgitariste Aija Repša. Laika gaitā mainejīs ari grupys spieliešonys stils, kai „Bez PVN” skaņ niu – breineigi var dzierdēt grupys ūtrajā, ituo goda junī izdūtajā albumā „Reits”. Pyrmais grupys albums „Pyrms vuorda…” izguoja 2006. goda beiguos i tyka nomināts Latvejis Muzykys īrokstu goda bolvai kategorejā „Lobuokuo debeja”.

10 godu laikā grupa uzastuojuse i pīsadalejuse vaira kai 500 koncertūs, pasuocīņūs, bejušys dažaida leluma veiksmis, bolvys i tituli leluokūs i mozuokūs festivalūs i konkursūs. Leidz šam atpazeistamuokuo grupys dzīsme ir bejuse „Screen”, kas 2008. goda sezona kliva par LR2 „Muzykaluos bankys” spylgtuokū debeju.

Piec puora godu skotuviskuos pauzis itūgod „Bez PVN” atsuokuši aktivu koncertdarbeibu, deļ tuo eipaši prīcuosīs ar atbaļsteituojim sasatikt i nūsvieteit nūtikšonu izsludynuotajūs koncertūs: 21. novembrī Daugavpilī – vīsneicys „Park Hotel Latgola” restoranā „Plaza”, 27. novembrī grupa prīcēs rēzeknīšus „Ausmeņa kebabs”, 4. decembrī byus koncerts Jelgovys muzykys klubā „Jelgavas krekli”, 11. decembrī gaidoma sasatikšona Reigā, klubā „Četri balti krekli”, bet 27. decembrī vysus draugus, atbaļsteituojus i leidza jutiejus „Bez PVN” gaideis tīpat, kur vyss īsasuoce – Kuorsovys kulturys nomā.

Koncertus informativi atbolsta: portals draugiem.lv, lakuga.lv, “Vietējā Latgales Avīze”, “Ludzas Zeme”, Latgolys radeja i žurnals “A12”.

Vaira par grupu http://bezpvn.lv

„Bez PVN” socialajūs teiklūs:

http://draugiem.lv/bezpvn

http://twitter.com/BezPVN
https://facebook.com/grupa.BezPVN

Karteņā grupa “Bez PVN”, foto Laura Pastare

BezPVN_jubilejs_plakats_gola_orz_web_620

Print Friendly, PDF & Email

Kalenders

May
29
Tre
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
May 29 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Grupys “Saucējas” koncerts i daņ... @ Reiga
Grupys “Saucējas” koncerts i daņ... @ Reiga
May 29 @ 19:00 – 21:00
Latvejis Kulturys akademejis tradicionaluos dzīduošonys grupa “Saucējas” trešdiņ, 29. majā, 19.00 aicynoj is koncertu Āgenskolā Pāvula Jurjāna muzykys školys estradē, Bolūžu īlā 24. 
May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]