LaKuGa sovim skaiteituojim pīduovoj Zīmyssvātku ailenis. Tuos uzraksteitys dažaidūs laikūs i saglobuota autora laika volūda.

 Jõņs Klīdzējs

Zīmassvātkūs

Ak, senais saucīņs – jys otkon ceļus staigoj,
Pōr zilim mežim sauc un nūgrymst sadžōs;
Un apklyust atbaļlss – daudzi vaigi breinā zaigos:
Moldu gojīns krūplais te jaunai stygai dzymst…

Gaišu pīlīs tōļums tymstūšajū lūgu,
Uz golda smaržōs sīns – klōs mōte goldautu;
Bolts klusums apjims nirgōjūšū slūgu,
Kas zemes sōpēs un myusu klandōs reti rymst…

Tod naktī šymā asasauks ar’ zvoni,
Kas zemes dyumakōs un zvaigžņu tōlēs trīc.
Uz Betleemu otkon prīkā ceļōs goni
Ar Myužu Gaismu – Jū lai sasatikt…

Tu, siržu mōt, nu manis ari aiznes!
Kryuts sauks tev bazneicā – Jam sveicīnu –
… Braukš mōjā tod, kad reitā izzuss zvaigzne,
Un lāni snīdzeņš eglēs īsōks snigt…

*

V. Galvanovska

Kreit snīgs

Kreit snīgs.
Tik dzidri lāns, tik līgs,
Bez namīra un steigas
Kreit snīgs.

Tu nōc.

Pa boltom lejom klusi nōc,
Un dvēs’lē saņ kai kūkļu steigas. –
Tu nōc.

Tu ej.

Aiz boltom syla ānom ej,
Un acīs atmirdz saules seikas, –
Tu ej.

Kreit snīgs.

Tik gurdi lāns, tik līgs,
Bez namīra un steigas
Kreit snīgs.

*

Jurs Pabērzs

Zīmassvātku naktī

Jau nakts. Vyss apkōrtnē ir klusu.

Jau ikdīniški dorbi rymst.
Vyss mōjā bauda svātku dusu.
Vyss jaukā svātku rūtā grymst.

Kai sudobrs mēness augšā laistos.

Un zvaigžņu miļzeigs daudzums speid.
Kai gunteņas tōs sevī saistōs
Un, reizem kreitūt, gaisā sleid.

Augš padebešus lidinēdams,

Bolts Eņgeļs Dīvu gūdynoj
Un, Viņa vaļu pīpiļdeidams,
Jys jauku vēsti slūdynoj:

„Ak, teicit, ļaudis, Dīvu, teicit,

Jam gūdu, cīnu dūdami!
Un jaundzymušu bārnu sveicit,
Pret Viņu ceļūs krystdami!

Viņš dzyma jau. Viņs mani syuta

Un mīru Viņš jums dōvynoj,
Lai jyusu dzeives dīna gryta
Nu sovom važom breivynoj.

Viņš bādom, vōrgim dora golu,

Viņš skumas sirdis prīcynoj…
Ak, steidzitēs jyus uz tū molu,
Kur svātī Bārnu sveicynoj…”

Un Eņgeļs zyud… Tō skaistō dzīsma

Pa vysom molom otri skrīn.
Un Dīva vōrdu svātō līsma
Ar mīru ļaužu sirdis sīn.

/1911. gods/

Karteņa: LaKuGys arhivs