“Kolnasātā” eisi pyrms Zīmyssvātku i pošā saulgrīžu laikā gasteis kapelu ”Vīteri” i ”Rikši” puorstuovi – Sandra Stare i Ēriks Zeps. Parunuosim par latgalīšu Zīmyssvātku tradicejom i jaunīšu i bārnu davumu jūs saglobuošonā i tuoļuok nesšonā, dzīsmem i folklorys vierteibu myusu dīnuos. Sandra i Ēriks akustiskai nūspielēs ari Zīmyssvātku dzīsmi nu ”Vīteru” repertuara.
Sižetā nu Latgolys apzynuosim, kai latgalīši sviņ Zīmyssvātkus – kaidys ir myusu tradicejis, kaida ir bazneicys, kristīteibys i saimis nūzeime itymūs svātkūs.
Sovpus vuordineicā Valentins Lukaševičs pastuosteis par Kūču vokoru – Latgolai rakstureigu Zīmyssvātku vuordu i juo tradicejom.
Raidejumā aktīra Kristapa Rasima lasejumā izskanēs latgalīšu rakstnīka Jura Pabierža zīmys saulgrīžu stuosts ”Laime par laimi”. Stuosta darbeiba nūteik 20. godu symta pyrmajā pusē, eisi piec 1. pasauļa kara, kod kaidai latgalīšu saimei ir lela nalaime, tok tāva i muotis lobuos sirds deļ nūteik Zīmyssvātku breinums i saimē atīt lela laime.
Klausitēs i prīcojitēs leidza! Lai svieteigs Zīmyssvātku laiks i lai prīca atīt kotrā saimē!

Raidejumu klausīs ite.

Raidejumu taisa – Aigars Runčis, Daira Kokoreviča i Ilze Sperga.

Ziņu sagataveja: “Kolnasāta”