Ar dzimšonys dīnys koncerta nūspieliešonu, sveicīnu i duovonu sajimšonu un ļustiešonu vysys nakts garumā  27. decembrī nūsaslēdze grupys „Bez PVN” 10 godu jubilejam veļteitais koncertturs.

Pyrmī koncerti dažaiduos piļsātuos: Daugovpiļs, Rēzekne, Jelgova i Reiga – kotrs koncerts ar cytaiduoku pīredzi, uzastuošonys vītu, situaceju. Pēdejais koncerts Kuorsovā jau beja koncerts sātā, kur grupa pyrma 10 godu izsuokuse sovys muzykaluos aktivitatis. Dzimšonys dīnys vokorā gon grupai, gon gostim beja vareiba atsavērt laikā i padareitajā gon ar vacu karteņu, video, gon atmiņu stuostu paleidzeibu. Kuorsovys koncertā par gari laiki nu skotuvis izskanieja ari sovu popularitati dabuojušuo dzīsme „Kur ir Pičuks?”, kod pi bungom apsasiede ari grupys pyrmais bundzinīks Pīters Orinskis. Pādejuo dzīsme izskanieja sešūs nu reita, i piec tam gosti tyka meili lyugti jau īt iz sātu.

Kai grupai guoja pyrmajūs četrūs tura koncertūs, varat apsavērt vīnu dzīsmi garā retrospektīvā video.

2013. gods grupai „Bez PVN” beja ražeigs i darbeigs – atsagrīzšona iz skotuvis ar koncertim dažaiduos Latvejis vītuos, albums „Reits” videoklipi dzīsmem „Tylts” i „Zuoleite”, jubileja koncertturs, nu skaidrs ir vīns, ka 2014. gods nabyus mozuok kluss – dūmys par trešū albumu, kura puora dzīsmis jau dzīduotys koncertūs, koncerti i daleiba festivalūs, jauni videoklipi – tū vysu varat gaideit nu Gunta, Kristapa, Valda, Jura i Normana itūgod.

Grupa soka paļdis vysim leidzjutiejim, draugim, fanim i sveiciejim, kas beja kluot ci syuteja sveicīnus, kai ari informativajim atbaļsteituojim, kas podturieja vysu koncertturu: portalam draugiem.lv, Latgalīšu Kulturys gazetai, žurnalam “A12”, Latgolys Radejai, gazetom “Ludzas Zeme” i “Vietējā Latgales Avīze”.

Vaira par grupu skaiti: http://bezpvn.lv

Grupys “Bez PVN” 10 godu jubileja svieteišona Kuorsovā. Foto nu grupys arhiva.