Aglyunys nūvoda turisma buklets – ari latgaliski

Aglyunys nūvoda turisma buklets – ari latgaliski

Aglyunys nūvoda UAC (uzjiemieju atbolsta centrs) sadarbeibā ar LĢIA (Latvejis Geotelpiskuos informacejis agenturu) ir sagatavejuši aktualizietu Aglyunys nūvoda turisma bukletu, kurymā atrūnama informaceja ari latgalīšu volūdā.

Buklets ir sagataveits latvīšu volūdā, bet itūgod paraleli angļu, krīvu i vuocu volūdys tulkuojumim ir īkļauta ari latgalīšu volūda. Tys itymā godu symtā ir pyrmais turisma buklets, kurā ir īkļauta latgalīšu volūda. Izdevieji soka, ka tū svareigi īkļaut itaidūs bukletūs, na tik partū, ka ir sabīdreibys daļa, kas skaita latgaliski, bet ari partū, ka tys ļaun paruodeit tū, ka na vysi vuordi i vuordu savīnuojumi latgalīšu volūdā ir tik leidzeigi latvīšu volūdai, veicynojūt volūdys sovpateibu saglobuošonu i populariziešonu. Apzeimuojumu sadaļā varam skaiteit taidus vuordus kai škārsteikls, bārnu kaitu laukumeņš, ierklu laivys, sīlejs, mauduošonuos vīta, juozdeišona i cytus.

Bukletā var apsavērt Aglonys nūvoda karti mārūgā 1:70 000, kurā dalykts ari reljefa sluoņs, kai ari informaceju par 10 apsavieršonys objektiem, 32 gostu sātom, ritiņu i iudiņa maršrutim i informaceju par Aglyunys nūvodu.

Bukletā īkļauti ari 6 tematiskī cīmi, kas dorbojās nūvoda teritorejā: Aglyunys Alpu aktivuos atpyutys cīms, Meža burveibys cīms, Senču tradiceju cīms, Upiņu sīra cīms, Rodūšūs prasmu cīms, Gūdu saimineicu cīms, kai ari 5 gostu sātys, kur var nobaudeit Latgolys kulinarū montuojumu.

Ziņa sagataveita piec UAC i LĢIA dūtuos informacejis

Print Friendly, PDF & Email

Nūtikšonu kalendars