Daugavpiļs teatrī tūp izruode latgalīšu volūdā

Daugavpiļs teatrī tūp izruode latgalīšu volūdā

Daugavpiļs teatra rodūšuo komanda ir suokuse dorbu pi izruodis latgaliski – “Dabaseibys pūddarneica” aba “Viņa debešķības Laimesciema podniekdarbnīca”. Pyrmizruode paradzāta 15. februarī.

Mīlesteibai pīmeit dziļš, īkšejs tragikomisms. Nav najaušeiba, ka tei ir stypruoka pat par smierti. Byuteibā mīlesteibys olkys myužeigi ir naremdynomys. Tuos varā var pagaisynuot pruotu i tod kaidam teik īdaleita uoksta, bet kaidam karaļa lūma, bet akluots palīk vaicuojums – voi jī reizem naapsamaina vītom!? Bet, ka saīt īīt mīlys trejstyurī, kur nabyut par līkū vairs nav tik vīnkuoršai – suocās eistys guņskristeibys. I mīlesteibys tragikomisms tū ļaun piļneibā – mīlys trejstyurs ir vīns taids grunteigs ceplis ar leluoku voi mozuoku mīlys cīsšonu devu. Zaudietuoji i īgivieji ir vysi. Vaineigūs nav. Voi sīvīte, ļaunūtīs sovai kaislei, aizraudama i vīnu, i ūtru veirīti, beiguos pagaisynoj poša tū, piec kuo vysvaira ilgojās?

Lūmuos: Kristīne Veinšteina, Māris Korsiets, Egils Viļumovs.
Režija: Juris Jonelis
Lugys autors: Lauris Gundars
Scenografeja i kostimi: Liene Pavlovska
Horeografeja: Irina Saveļjeva
Muzykys aranžeja: Einārs Lipskis
Gaismu muokslinīks: Sergejs Vasiļjevs

Daugavpiļs teatrī tei ir jau catūrtuo izruode latgalīšu volūdā. Īprīkšejūs godūs īstudeitys taidys izruodis kai “Klepernīku pogosta zvaigzne”, “Rūžys byudu golūs” i “Vosorys saulgrīžu burvesteibys”.

Ziņa sagataveita piec Daugavpiļs teatra informacejis

Print Friendly, PDF & Email