18. janvarī Rēzeknē i 25. janvarī Reigā jaunīšu postfolklorys grupa “Rikši” reizē nūsvietieja i treis godu jubileju, i sova debejis albuma “Pa pyrmam” prezentaceju. Ar sovim īspaidim par koncertim pīkryta daleitīs grupys dalinīki Zane Dukaļska i Ēriks Zeps.

Zane: “Obeji koncerti maņ cīši patyka, tyka sajimta cīši lela atsauceiba i pozitiva energeja nu skateituoju. Rēzeknis koncerts beja svineiguoks i, ruodīs, ari nūzeimeiguoks, partū ka tys beja pyrmais prezentacejis koncerts, kai arī piec ilguoka puortraukuma pirmais lelais koncerts. Tī beja saguojuši rodi i draugi, beja prīca klauseitīs, kai jī saceja lobus vuordus par padareitū dorbu. Pateikami ari tys, ka cylvākim ir vēļme īsaguoduot myusu CD. Sovukuort koncerts “Folkklubā Ala Pagrabs.” beja nūzeimeigs ar tū, ka mes tī spieļuom gluži kai sovā sātā. Sajiuta it kai iz sātu saguojuši gosti i suocās jautreiba i doncuošana. Skateituoju ovacejis beja rikteigs energejis lādeņš, kuo pītiks vēļ ilgam laikam. Vīnkuorši naaizmierstams vokors. Ceru, ka myusim byus vēļ gars ceļš īmams kūpā i pītiks spāka padareit lelus dorbus, i prīcēt klauseituojus vēļ ilgi.”

Ēriks: “Taipat kai diska rasšonūs, ari pyrmskoncertu nūskaņu raksturoj streseņš, laika tryukums i pacyluots nūskaņuojums. Vēļ aizvīn atguodoju tū puorprīceigū lākuošonu, kod tyka atvārts pyrmais “Pa pyrmam” disks. Prīca, ka koncerti izadeve taidi pat kai ir “Rikši” – jautri, ar nalelu nūpītneibys devu, dzeivisprīceigi i humora puorpylni. Pozitivuos skateituoju atsauksmis beja kai “Bryuvera” lase dvēselei, partū ka golvonais “Rikšu” aizdavums palīk namaineigs – lai kūpā ir jauki i baudeituojam ir jauki. Piecpasuokums (afterparty), prūtams, pamateigi atzeimāts, deve stimulu tuoluokajai darbeibai, partū ka (sokūt Ivara vuordim): “Ka ir pa pyrmam, tod byus ari pa ūtram.” Niu ar pozitivu garšu piec jubilejis i prezentacejis asam gotovi giutīs kluotyn jaunim projektim, izaicynuojumim i jautreibom.”

“Rikši” tyka izveiduoti 2011. godā kai Rēzeknis kulturys noma folklorys draugu kūpys “Vīteri” veteranu apvīneiba. Grupys sastuovā ir Ēriks Zeps (akordeons, bolss), Zane Dukaļska (bubyns, sytaminstrumenti, bolss), Madara Broliša (vijūle, bolss), Ivars Utāns (basgitara, bolss) i Mārtiņš Arbidāns (gitara). “Rikšu” albumu “Pa pyrmam” īspiejams nūsaklauseit grupys sātys lopā.

Kartenis: Evika Muizniece