Rēzeknis nūvoda vokaluo studeja “Skonai” aicynoj “Dasadūrt dabasim”
28. februarī 17.00 stuņdēs Rēzeknis nūvoda dūmis zalā nūtiks Rēzeknis nūvoda vokaluos studejis “Skonai” originaluzvaduma “Dasadūrt dabasim” pyrmizruode.
Mīlesteibys mienesi nūslādzūt i sajiutūt pavasara dvašu sevī, uzvadums byus kai īspieja kotram sajust dasadūršonu dabasim, kotram sovom, kotram cytaidom i vysim kūpā sadzierdeitom, satyktom i vysam puori asūšom.
Deju sūlim mejūtīs ar dzeju i muzyku, vokaluos studejis “Skonai” jaunīši kūpā izdzeivuos i vērs durovys mīlesteibys stuostim…
Uzvaduma pamatā ir Inetys Atpilis-Juganis dzeja i dzīšmu teksti, Guntrys Kuzminys muzyka i Edgara Juknys horeografeja.
Inetys i Guntrys rodūšuo sadarbeiba turpynojās, juos ir tykušuos cytūs rodūšūs projektūs, tok tik apjūmeigs dorbs teik veiduots pyrmūreiz. Ari “Skonai” sastuovā pyrmū reizi pošu spākim teik veiduots originaluzvadums, kuram radeiti jauni dzejis i muzykys daiļdorbi.
