Leidz 15. martam Latgolys Kulturviesturis muzejā apsaverama treis muokslinīku dorbu izstuode “Ieslēgts – izslēgts + feromoni”. Izstuodē pīsadola Diāna Apele (Rēzekne) ar grafikys dorbim, Mairita i Ivo Folkmani (Daugovpiļs) ar telpiskim objektim.

Izstuodis autorus vīnoj mīlesteiba iz izciluo 20. godu symta muokslinīka Pablo Pikaso daiļradi, īsadvesmojūt nu juo dūmu leiklūčim i muokslinīciskuos izteiksmis labirintim. Pikaso ar sovys personeibys spāku ir ītekmiejs daudzus i pasaulī, i Latvejā. 20. godu symtā juo daudzpuseiguo dorbuošonuos ir davuse impulsu gondreiž vysim muokslys veidim tūs atteisteibā breiveibys i atkluoteibys vierzīnī. Ari izstuodis autorim Pikaso muoksla ir kai “pasaceļšonys tramplins” i “atspierīņa punkts” izstuodē eksponātūs rodūšūs dorbu tapšonā.

Diāna Apele sovūs linogrīzuma tehnikā izpiļdeitajūs grafikys dorbūs akcentu līk iz gaismys i tymsys mijīdarbeibu, formu ekspresivitati i tymuos ītvartuos kusteibys sprīdzi. Autoris emoceju uzplaiksnejums malnboltajūs i kruosu linogrīzumūs paviestej vaira nakai tik klusuos dobys kompozicejis atkluosmi, – tymuos jiutama cylvāka naradzama kluotbyutne ar attīceibu sprīdzi, kaisli i klusiešonu. Ideja grafikys dorbu serejai “Ieslēgts – izslēgts” roduos, pietejūt Pikaso kompozicejis linogrīzumā, kur klusuos dobys naatjemama sastuovdaļa ir kaids gaismys olūts.

Sovukuort Mairita i Ivo Folkmani izstuodē radzamūs telpiskūs objektu izveidē ir īsadvesmuojuši nu Pikaso rodūšuo davuma tielnīceibā, formu abstrakcejis i izteiksmis breiveibys. Obeji autori labi pazeist i puorvolda vysaidu materialu pīlītuojumu, lai skaidruok izsaceitu objekta idejā ītvartū tālu. M. Folkmane i I. Folkmanis sovūs dorbūs apcer natveramū, gaistūšū i saistūšū cylvāku sovstarpejuos attīceibuos, pīduovojūt skateituojim vizualizātu i telpisku sajiutu tvārumu materialā.

Feromoni ir gaistūšys kimiskys vīlys, kū izdola dzīdzeri cylvāka uodā. Tys ir eipašs smuords, kas kotram nu myusim ir unikals i vienreizeigs. Itys smuords spiej pīsaisteit voi taišni pretieji – atgryust pretejū dzymumu, kai ari ītekmēt tuo reiceibu. Pastuov teoreja, ka taišni feromoni ir atbiļdeigi par tai sauktū īsamīliešonys sajiutu, kod cylvāki suoc stuosteit par tauriņu liduošonu vādarā, izaruoda, ari teicīņs “Storp jim volda koč kaida kimeja” nav vys nikaids parostais sokomvuords.

Ziņa sagataveita piec Latgolys Kulturviesturis muzeja dūtuos informacejis
Karteņa: Diānys Apelis grafikys dorbs nu serejis “Ieslēgts izslēgts”