“Boņuki” sadaleiti!

“Boņuki” sadaleiti!

Gūdynojūt lobuokūs veikumus latgalīšu kulturys dzeivis uzturiešonā i boguotynuošonā 2013. godā, 24. februara vokorā Latgolys viestnīceibā GORS padūtys Latgalīšu kulturys Goda bolvys “Boņuks 2013” statuetis 19 nominacejuos.

Nominacejā “Lobuokais snāgums dzejā” ar “Boņuka” bolvu nūvierteita Inetys Atpilis-Juganis dzeja latgalīšu volūdā. Bolvu par lobuokū prozys dorbu sajēme Guntix nu Vertukšnis par stuostu “Reits mežā”. Sovukuort par lobuokū izdavumu/gruomotu paguojušajā godā atzeita Latgolys lingvoteritorialuo vuordineica.

Nominacejā “Lobuokais snāgums alternativajā muzykā” apbolvuots projekts “Kapļi” i albums “Prauda par Madali”. Nominacejā “Lobuokais snāgums akademiskajā muzykā” gūdynuots komponistis Ilonys Rupainis veikums – skaņdorbi, kas izskanieja XXV Vyspuorejūs Dzīšmu i XV Deju svātku nūslāguma koncertā. Nominacejā “Lobuokais snāgums tautys muzykā” bolvu sajēme DJ Monsta i Biruta Ozoliņa par albumu “Sauli sēju”. Sovukuort par goda debeju muzykā “Boņuka” bolva padūta grupai “ZePikniks”. Atsasaucūt iz Latvejis Izpiļdeituoju i producentu apvīneibys dūtajim datim, par goda spālātuokū dzīsmi nūsaukta Alda Kisis dzīsme “Strūga”. Par goda lobuokū muzykys video atzeits dueta “Poparts” videoklips “Muna sirds”. Nominacejā “Lobuokais snāgums pop/rok muzykā” bolva padūta grupai “Bez PVN” i albumam “Reits”.

Bolva par latgalīšu volūdys populariziešonu padūta Latvejis Radejis pyrmuos programys raidejumam “Kolnasāta” i tuo veiduotuojim. Par goda saiminīku atzeits jaunais uzjiemiejs Valters Murāns, kurs Rēzeknē saimnīkoj kopejneicā i kulturys pasuokumu nūrisis vītā “Ausmeņa kebabs”. Deveiguokais latgalīšu kulturys atbaļsteituojs paguojušajā godā bejs uzjiemiejs Juoņs Blaževičs, kurs jau daudzus godus atbolsta latgalīšu gruomotu izdūšonu.

Par goda snāgumu vizualajā muokslā bolva padūta fotografam Mārim Maskalānam par projektu “Nagļi. LV 4631”. Par goda lobuokū snāgumu skotuvis muokslā atzeits uzvadums-dzīšmu spiele “Ķēniņmeita. Latgales pasaka”. Nominacejā “Lobuokais snāgums audiovizualajā muokslā” bolva padūta Latvejis Televizejis pyrmuo kanala dokumentalajam kinu ciklam “Cytaidi latviskais” i tuo veiduotuojim. Par goda cylvāku kultūrā paguojušajā godā atzeita dzīduotuoja i vokaluo pedagoge Guntra Kuzmina. Sovukuort par goda nūtykumu latgalīšu kulturā 2013. godā atzeita Latgolys viestnīceibys GORS atkluošona.

Bolvu par myuža īguļdiejumu latgalīšu kulturā nu kinys “Cylvāka bārns” režisora Juoņa Streiča rūkom sajēme kordirigente i muzykys pedagoge Terēzija Broka.

Latgalīšu kulturys Goda bolvys “Boņuks 2013” apbolvuošonys vokora gostus ar muzykalim prīšknasumim prīcynuoja Kārlis Kazāks, Latgolys Studentu centra folklorys kūpa “Ceidari”, dzīdūšuo Tihovsku saime, postfolklorys grupa “Rikši”, grupa “Dabasu Durovys”, projekts “Kapļi”, vokaluo studeja “Skonai”, folklorys draugu kūpa “Vīteri”, grupa “Bez PVN”.

“Boņuka” statuetis latgalīšu kulturys paguojušuo goda lobuokajim dorbūnim padeve dzejneica i publiciste Anna Rancāne, muziks Ēriks Zeps, Latgolys gruomotu sorgs Juoņs Eļksnis, muziks Kārlis Kazāks, vokaluo pedagoge Lolita Greitāne, Tihovsku saime, kulturys apvīneiba “Ausmeņa Records”, dzīduotuojs Gints Ločmelis, kino entuziasts Edgars Blinovs, dzīduotuoja Aija Eriņa, kulturys darbineica Ruta Cibule, Rēzeknis piļsātys mērs Aleksandrs Bartaševičs, Latgalīšu kulturys bīdreibys vaļdis lūcekle Skaidreite Baltace, Latvejis Muokslys akademejis “Latgolys sāta” vadeituoja Ilma Rapša, akters Kristaps Rasims, kinorežisors Juoņs Streičs, Latgolys viestnīceibys GORS vadeituoja Diāna Zirniņa, kai ari “Boņuka” bolvys radeituoji Guntis Rasims i Raibīs. Vokora vadeituoju gūdā – Latgolys viestnīceibys GORS dirigents Juoņs Stafeckis i Rēzeknis Tautys teatra akters Aldis Leidums.

Latgalīšu kulturys Goda bolva “Boņuks” radeita ar mierki veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kulturā paguojušuo goda grīzumā. “Boņuks” ir vīneiguo goda bolva, kas eipaši izceļ i gūdynoj sasnāgumus latgalīšu kulturys dzeivē, i tei tyka padūta jau sastū godu. Itūgod īvīstys nalelys izmainis nūlykumā i nominacejuos – vairuokys apvīnuotys, bet cytys guojušys kluotyn, pīmāram, pyrmū reizi tyka padūtys bolvys par sasnāgumim vizualajā, audiovizualajā i skotuvis muokslā. Latgalīšu kulturys Goda bolvai “Boņuks 2013” tyka sajimti 84 dasacejumi, bolva tyka padūta 19 nominacejuos. Žūrejis komandā dorbuojuos tī, kas īprīkšejūs godūs poši bejuši kai nominantu, tai ari “Boņuka” bolvys sajiemieju pulkā. Žūrejis komandu kuplynuoja ari tuoluoki gosti, kas iz latgalīšu kulturys dzeivis nūrisem varieja pasavērt nu molys.

“Boņuks 2013” reikuotuoji ir Latgolys viestnīceiba GORS i bīdreibys “Kukuži” i “Latgolys Producentu grupa”. Latgalīšu kulturys Goda bolvys “Boņuks 2013” nūrisi atbolsta Vaļsts Kulturkapitala fonds ar Latgolys regiona atteisteibys agenturys Latgolys kulturys programys projekta finansiejumu, Rēzeknis piļsāta, Rēzeknis, Bolvu, Dagdys. Viļānu, Kuorsovys i Preiļu nūvods, uzjāmums „Latgales ziedi”, „Valmiermuižas alus”, kai ari bolvys padūšonys ceremonejis muzykaluos apvīneibys i žūrejis komanda.

Ziņa sagataveita piec Latgolys Viestnīceibys GORS dūtuos informacejis
Karteņa: Juoņs Litavnīks

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]