Komponists Rihards Dubra radejs muzyku kinai par Latgolys partizanim
Komponists Rihards Dubra radejs muzykalū partituru tūpūšajai dokumentalajai kinai Segvārds Vientulis.
Kina viestej par Latvejis Tāvzemis Sorgu partizanu Apvīneibys (LTS(p)A) prīšksādātuoja Ontona Juhņeviča tragiskū liktini pieckara Latgolā. Juhņevičs beja Vonogu Rūmys-katuoļu draudzis prāvests, kurs īsasaisteja nacionalūs partizanu ceiņuos pret padūmu okupacejis režimu.
Kina ir veiduota doku-art žanrā, kurā dokumentali nūtykumi interpreteiti inscenejuma formā. Viestejuma strukturu veidoj ari viesturiski dokumenti i kartenis.
Latvejis teatru akteru atveiduotī kinys varūni ir realys viesturiskys personys. Prīstera Ontona Juhņeviča lūmā īsajuts akters Varis Piņķis, čekys vacuokū leitnantu Longinu Avdjukeviču atveidoj akters Vilis Daudziņš, LTS(p)A štāba prīkšnīku – akters Edgars Samītis. Arhiveiskupu Springoviču atveidoj Dailis teatra akters Jurs Bartkevičs, Vili Lāci – Līpuojis teatra akters Edgars Pujāts, Juoni Klimkānu – Andris Bulis, školuotuoju Vilcānu – Nacionaluo teatra akters Juris Jope, Juoni Franci Klimkānu – Valmīrys teatra akters Rihards Rudāks. Kinā pīsadola ari Daugovpiļs teatra akteri – Ritvars Gailums, Egils Viļumovs, Māris Korsietis i Valdemārs Karpačs. Kūpā ar profesionalim filmējās ari cylvāki, kurim itei ir pyrmuo kino pīredze.
Kinu Segvārds vientulis paradzāts pabeigt 2014. godā. Itūšaļt teik vaicuoti leidzekli kinys pabeigšonai – montažys, kruosu korekcejis i īskaņuošonys dorbim.
Kinys scenareja autoram i režisoram Normundam Pucim itei ir pyrmuo pilnmetražys kina.
