Bīdreiba „Latgolys Studentu centrs” pīduovoj plašuokū gruomotu kluostu latgaliski i par Latgolu vīnā vītā. Pīduovuojumā ītylpst gruomotys, kas izdūtys pyrms vairuoku godu i cytur nav pīejamys, kai ari vysai naseņ izdūti dorbi, pīmāram, gruomota par Francisku Varslavānu, dažaidu fotografu apkūpuotais fotografeju kruojums „Latgale” i tt. Puordūšonā ari žurnals „A12”, dažaidi suveniri ar Latgolys simboliku i latgalīšu muziķu audio īroksti.

„Latgolys Studentu centrs” ar sovu gruomotu stendu pīsadola dažaidūs gruomotu svātkūs vysā Latvejā, kai ari izplota gruomotys sovūs birojūs Reigā i Daugovpilī. Jis sasadorboj ar gruomotu autorim i izdeviejim, deļtuo pīduovoj gruomotys, kurys cytur navar nūpierkt.

Storptautyskuo gruomotu i izdevnīceibu izstuode „Baltijas Grāmatu svētki 2014”, Storptautyskyjā izstuožu centrā Kīpsolā nūtiks nu 28. februara da 2. martam. Dorba laiks pīktdīnē i sastdīnē byus nu 10:00 da18:00 stuņžu, svātdīnē — nu 10:00 da 17:00 stuņžu.

Sagataveja: Agita Vigupe

Kontaktinformaceja: reiga@lgsc.lv