8. martā Preiļu kulturys nomā grupa “Green Novice” prezentēja sovu jaunū albumu “Padebeši”.

“Green Novice” izveiduota jau 2000. godā Preiļūs, bet patstuoveigā i namaineigā sastuovā grupa spielej nu 2007. goda janvara. Kai daudzys jaunuos grupys, ari “Green Novice” suoce ar popularūs grupu dzīšmu atskaņuojumim (kaverim), cikom nūsaformēja grupys skaniejuma stils i skotuvis veidūls. Niu “Green Novice” spielej folkmetala stilā, kurys spylgtuokais puorstuovs Latvejis muzykā ir grupa “Skyforger”, bet “Green Novice” galvonuo atškireiba ir tei, ka jī dzīd latgalīšu volūdā. Dzīšmu autori ir jī poši, rokstūt muzyku i vuordus, īsadvesmojūt nu latgalīšu tautys kulturys un tautysdzīsmem.

Grupys sastuovs: Alvis Bernāns – gitara, vokals; Zigmunds Čeksis – gitara; Vitālijs Piskunovs – bass; Valdis Metlāns – bungys. Diveji nu grupys dalinīkim ir dzymuši, auguši i vuicejušīs Preiļūs, bet itūšaļt vysi grupys dalinīki struodoj, dzeivoj i breivajā laikā muzicej Reigā. Alvis struodoj par medicinys fiziki, Zigmunds dorbojās informacejis tehnologeju jūmā, Valdis ir byuvinženers, bet Vitālijs struodoj par optometristu. Sovukuort vysu sovu breivū laiku puiši veļtej golvonajai dzeivis kaisleibai – muzykai.

Albums “Padebeši”, kura prezentacejis pasuokums – koncerts nūtyka Preiļūs 8. martā, ir seņ izlūluots. Prezentacejis koncertā pīsadaleja ari vairuokys Latvejā zynomys latgalīšu grupys – “Bez PVN”, “Dabasu Durovys”, “Rikši”, kai ari Kroma kolna bruoliste.

Grupa sovu īspieju rūbežuos koncertej i Latvejā, i uorzemēs. Pādejais lelais koncerts beja Lītovā Zarasai festivalā “Menuo Juodaragis” paguojušuo goda rudinī.

Ka 8. martā asat palaiduši garom grupys “Green Novice” i draugu koncertu Preiļūs, tod jiusim vēļ ir īspieja izbaudeit latgalīšu folkroku grupys “Green Novice” izpiļdejumā 14. martā Jelgovā klubā “Melno Cepurīšu balerija”, 15. martā Daugovpilī klubā “Artilērijas pagrabi” i 22. martā Valkā klubā “309. kabinets”

Sovukuort “Green Novice” albumu “Padebeši” sevkurs var nūsaklauseit i īsaguoduot ite. http://greennovice.bandcamp.com/

Ziņu sagataveja: Aleksandrs Čerņavskis
Karteņa: Santa Ancāne