Sagaidūt i atzeimojūt Storptautiskū teatra dīnu 27. martā, obeju Rēzeknis teatru jaunīšu studejis prīcynuos skateituojus ar izruodem par dažaidom cylvāku sovstarpiejom attīceibom.

26. martā 18.00 Rēzeknis Kulturys nomā (Bruoļu Skrindu ūļneicā 3) Rēzeknis Tautys teatra jaunīšu studeja aicynoj iz pyrmizruodi piec Maikla Freina dorba „Nemobilie” Mārys Zaļaiskalns režijā. Izruodē teik rysynuota myusu dīnom cīši rakstureiga situaceja – sovstarpiejuos komunikacejis tryukums i tuos radeituos sakys.

Rēzeknis Tautys teatra jaunīšu studeja (vadeituoja Linda Lonska) jau decembrī reikuoja atvārtū teatra nūdarbeibu – meistarklasi, kod sevkurs interesents varēja īsavērt izruodis topšonys procesā. Itūšaļt ir daguojs laiks izbaudeit pusgoda laikā īstudietū izruodi, tai horeografeju veiduojuse Jekaterina Garfunkele, telpu i kostimus – Ināra Apele, skaņu i gaismys – Ints Salmiņš.

Studejā dorbojās i sovu teatra prasmi ir pylnveiduojuši vysaidu vacumu jaunīši – Regita Zeiļa, Jolanta Leitāne, Aiva Streļča, Agrita Vindača, Arturs Rozvjazevs i Jānis Noviks, kuri trešdiņ nūteikti gaideis skateituoju atbolstu i skaļus aplausus. Īeja iz izruodi ir bezmoksys, bet vītu skaits vys īrūbežuots, partū ka izruodis dalinīki i skateituoji sasatiks taišni iz skotuvis.

Sovukuort 27. martā 19.00 Rēzeknis Nacionalūs bīdreibu kulturys nomā (Latgolys ūļneicā 54) teatra-studejis “Joriks” jaunīšu studeja aicynoj iz izruodi piec Fjodora Dostojevska stuosta “Lēnprātīgā” Igora Mihailova režijā.

Izruode atkluoj veirīša i sīvītis sarežgeituos attīceibys, kuruos vīns ūtram tik cīši ir vajadzeigi, ka īt būjā nu ituos tyveibys, diveji cylvāki ir radeiti vīns ūtram, tok nav muociejuši voi nav gribējuši tū saprast, i ir palaiduši garom ispieju mīļuot…

Izruode krīvu volūdā.

Ziņa sagataveita piec Rēzeknis Kulturys i Turisma centra dūtuos informacejis