Muni atslāgvuordi, muni sajiutu markīri, muna kartoteka/Ligija Purinaša

Muni atslāgvuordi, muni sajiutu markīri, muna kartoteka/Ligija Purinaša

Ir cylvāki, kas dzeivi dola piec godim, ir taidi, kas mierej piec dorba, bet es dzeivi dolu piec literaturys koeficenta, – cik daudzi man jei ir tykuse. Sovdabeiguo periodizaceja. Ilgi dūmuoju, ka latgalīšu volūda  – tei ir muna sātys volūda, bet tagad saprūtu, ka sāta ir palikuse leluoka, i tys prīcej, – ka izadūd tikt cauri pošys barjerom, pošys caltam myuram. Vuicūs saprast sevi, visbīžuok – attīceibā pret koč kū voi kaidu. I saīt taida algebra: vīns pret vīns, vīns pret divi. I vēļ kaida taisne, paralelograms. Beiguos vairs na algebra, bet geometriskuo progreseja.
Ite ir muni atslāgvuordi, muni sajiutu markīri, muna kartoteka.

**

Cīši smuks pītupīns
Tī, kur siedieji tu
Peiragi pīdaga, aprikozi sažuva
Leiputreja izgaisa
Nu vot
Tagad tu saceri dzīsmis:
Ailinīks
Muzykants
Muokslinīks byusi…

Deļ kuo tu tai sovaiži smejīs?
Verīs
Aiztaisu lādi
Nūlīku biļdi

Zīma atguoja vālai.

**

myužeigs skaistums
tovom acim 18.novembrī
storp guņs lāpom
i eisziņom teleponā
koč kur paraleli
Bacardi i Hennesy
i mož daudz vaira
palics puori
zīma, snīgs i tys vyss
kū tu sauci par
“siediešona iz div krāslim”

tuoļums palīk
tuoļums napuorīs

**

sevis puorprodukceja
suocās i beidzās
vīnuvīt

**

ka es prostu
sprostai
dūmuot i smītīs
runuot par laika apstuoklim
i inflaceju
jūceigim cylvākim
i pošys muļkeibom/-beņom
byutu vīgluok
mani saprostu
a ka nasaprostu
tod smītūs
bet maņ nasaīt
prosta
byut sprostai

**

tovys syltuos acs
tai guņus svīž, ka
nūsprakstinej
i paraleli dzīd putyni
i skaips dzīd
a pasaulī treis pusis
puorsamainās
sūļs, vīns-div
ka itys ir pasadoble
tod es byušu karmena

**

mes sasadalejom pa piļsātom
kotrs sovā okrugā, mīstā, metropolē
i reizem daža skaips
nasasauc ciļvieceibu vīnuvīt

**

Dūmys navar aizbīdynuot
Durovys aizbuļtēt
Nav teirumā putynubīdakla
Sātā guņs nadag, tik
Iz skūrstyna dzeivoj starki
Kod nikod
Tukšums rinčī i vēļ vīni “Susekli”
Pylni ar šmakovku i durakim
Ka baiļs naktī skaiteit zvaigznis
Sova pogolma vydā
Bet vys vēl gribīs
Lai kaids man uzduovinoj īvys.

**

munys golvys birokrats
izlīk štampu
nadereigom attīceibom
iznycynuot, aizmierst,
hasta la vista, baby

Autore: Ligija Purinaša

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]