Komandu nakts spēlis Baļtinovā Zemis stuņdis ītvorūs

Komandu nakts spēlis Baļtinovā Zemis stuņdis ītvorūs

Baļtinovys nūvodā, pīsadolūt Zemis stuņdis akcejā, tyka reikuotys komandu nakts spēlis. Pasuokumu reikuoja nūvoda sabīdryskūs attīceibu specialiste Madara Balode, turisma informacejis konsultante Gunta Pudnika i nūvoda aktivī jaunīši, kas pīsadaleja, vodūt kontrolpunktus.

Kotrai komandai tyka īdūtys kartis ar nūruodejumim, kur atsarūn kontrolpunkti. Akcejis ītvorūs tyka izslāgts īlu apgaismuojums, partū, lai nanūsablūdeitu i lobuok byutu saradzams veicamais ceļš, kotrai komandai tyka īdūtys īdagtys luopys. Aizdavumūs tyka veiktys vysaidys aktivitatis, kai, pīmāram, komandys logo zeimiešona ar aizkluotom acim; bumbys viļkšona ar “laso”, kluceišu vaicuošona, ar lizeikom rūkūt volejbola laukumu, molkys nesšona (sasītim kūpā) kūpejam gunkuram.

Tai kai pādejais kontrolpunkts nūtyka pi parka estradis, pi gunkura, nūsaslādzūt aizdavumim, komandys siļdejuos, dzerūt korstu čaju i ādūt captys desenis i peirādzeņus. Komandom tyka aizdūts ari papyldaizdavums – spēļu laikā juoatrūn 5 prīškmati, kas vyslobuok raksturuotu sovu komandu. Nūteikumi beja taidi – tam ir juobyut koč kam osam, koč kam meikstam, koč kam dabeigam, koč kam aromatiskam, i koč kam, kam byutu juobyut kotrā sātā. Piec atraktivu komandu prīšknasumu sekuoja apbolvuošona, kurā kotra komanda sajēme gordys bolvys i diplomus par pīsadaleišonu. Uzvarēja komanda (ar atbylstūšu nūsaukumu) “Zibenszeļļi”, kas kontrolpunktu aizdavumus veice vyslobuok.

Vysu pasuokuma laiku komandu storpā vaļdeja i saceņseibu gors, i draudzeiba. Dalinīki atzyna, ka pasuokums ir izadevs, ka itys bejs cīši pateikams veids, kai pavadeit Zemis stuņdi.

Ziņu sagataveja: Baļtinovys nūvods
Karteņa: Ilga Pleša

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]