Tradicionalajā Latgolys Kulturviesturis muzeja “Vēstures mirkļu pieturā”, kas itymā mienesī nūtiks 8. aprelī 14.00, ar sovom zynuošonom par Rēzeknis ūļneicom daleisīs Ilmārs Pilinieks.

Ar kū myusu dīnu piļsātnīkam asociejās vuords „ūļneica”? Orientiers, kas nūruoda dzeivisvītu, dorbavītu, veikalu voi školu? Vīta, pa kuru puorsavītuot kuojom voi braukšus? Vīnkuorši – skaneigs vuords? Bet varbyut kaidam tei ir atmiņa par paguojušū, par kaidu sev i ari tautai tyvu cylvāku?

Rēzeknē ir vaira nakai 130 ūļneicu. Kotrai ūļneicai ir sova viesture – kod pyrmū reizi īzeimieta piļsātys planā, parkū taišni taids nūsaukums, parkū daudzom ūļneicom tī daudzreiz ari maineiti. Na veļti kaids rakstnīks ir sacejs, ka ūļneicu nūsaukumi ir piļsātys viesturis eisais kurss. Tī stuosta i par varu maiņom i vysaidim viesturiskajim nūtykumim, i par dzeivuotuoju nūsadorbuošonu, paruoda voi nu ūļneicys vierzīni voi atsarasšonys vītu. Ūļneicys ir nūsauktys i personvuordūs, i tom pīškierti apdzeivuotu vītu nūsaukumi. Vairuokim ūļneicu nūsaukumim ir sakars ar rakstureiguokajim objektim iz tom voi ari tī pauž itūs ūļneicu sovpateibys. Pietejūt ūļneicu viesturi, atsakluoj tūs puorvierteibys i izaugsme voi taišni pretieji – šudiņdīnys piļsātys kartē tūs vyspuor vaira nav.

Rēzeknīts Ilmārs Pilinieks ir izstaiguojs i izpietejs vysys Rēzeknis ūļneicys  i par kotru nu tom var pastuosteit sovu stuostu. Juo daudzu godu dorbs niu ir apkūpuots apjūmeigā pietejumā. 8. aprelī 14.00 „ūļneicu pietnīks” gasteis “Vēstures mirkļu pieturā “Vai tu zini savas ielas vēsturi?”” i sevkurs interesents varēs rast atbiļdis par sovys – niulinejuos, bierneibys voi dorba vītys ūļneicys viesturi.

Īeja: pīaugušajim 1,42 EUR (1, 00 LVL), školānim 0,71 EUR (0,50LVL).

Ziņu sagataveja: Anna Līpenīte, Latgolys Kulturviesturis muzejs
Karteņa: nu LKM kruojuma – Vīneibys (niu Breiveibys) ūļneica 1930-tī godi