Rēzeknis nūvoda vokalais ansamblis “Skonai”  (muokslinīciskuo vadeituoja Guntra Kuzmina) 12. aprelī devēs iz Reigu, lai ceineitūs ar Latvejis lobuokajim ansamblim konkursa “Balsis 2014” finalā. Mierktīceiga dorba rezultatā “Skonai” sasnīdze augstuokū rezultatu. Ansamblis izpiļdeja G. Kuzminys tautysdzīšmu apdaris “Gonu meita”, “Pyut, pyut viejeni”, kai ari G. Kuzminys originaldzīsmi “Skani, debesteņ”.

Konkursa “Balsis” organizators ir Vaļsts izgleiteibys satura centrs, tuo mierkis ir veicynuot bārnu i jaunīšu vokalūs ansambļu kolektivu rodūšū darbeibu, izaugsmi i atteisteibu, sasagatavejūt XI Latvejis školu jaunatnis dzīšmu i deju svātkim 2015. godā, padzilinuot bārnu i jaunīšu zynuošonys par latvīšu tautys dzīsmem i sekmēt jauna, muokslinīciski augstvierteiga i rodūša vokalūs ansambļu repertuara apgivi i paplašynuošonu.

Vokaluo ansambļa “Skonai” muokslinīciskuo vaddituoja Guntra Kuzmina soka: ““Skonai’’ jaunīši maņ saguodoj lelu prīcu! Ar jim struoduot i kūpā muzicēt ir naaprokstami! Jūs atdeve, mierktīceiba i dzeivisprīca ir tik eista i patīsa! Kūpā mes pīpyldom sapynus i kūpā myusim izadūd! Dzīduotuojam ir juobyut speiteigam, lai sasnāgtu īcarātū! Mums tei pīmeit! Prīcojūs par kotru dīnu, kuru varu pavadeit kūpā ar itim storojūšajim jaunīšim!”

“Mieginuojumūs struodojam cīteigai.  Īsasaistom dorbūs i korigejam prīšknasumus nu vysim īspiejamajim skotupunktim. Deju sūļūs juobyut izteiksmeibai. Kotrai kusteibai juobyut ar jāgu, partū muokslinīciskais snāgums i emocejis ir nu svora kotrā dzīsmē,” uzsver “Skonai” horeografs i deju pasnīdziejs Edgars Jukna.

Īspaidūs doluos ansambļa dalinīks Dāniels Jukna:  ““Skonai” breineigī sasnāgumi i augstais nūviertiejums ir lobs pīruodejums tam, ka mes asam kai saime – saprūtam, atbolstom vīns ūtru i jiutamīs cīši labi itymā draudzeigajā kolektivā. Svareiga ir ari motivaceja i vieliešonās, par kū juopasoka paļdis myusu vokaluo ansambļa muokslinīciskajai vadeituojai Guntrai, motivatoram, atbolstam i lelajai mamai, kas var atrast pareizūs vuordus vysod i vysur.”

“Skonai” soka lelu paļdis ari Rēzeknis nūvoda pošvaļdeibai par ryupem i atbolstu!

Juosoka, ka ari vosorā “Skonai” aktivai turpynuos sovu īrostū dorba gaitu, lai jau rudinī klauseituojim otkon ļautu, koč nadaudz sajust i dasadūrt dabasim  ar originaluzvadumu “Dasadūrt dabasim”. Rudiņs ir dzejis laiks, partū uzvadums tiks vēļreiz izdoncuots i izdzīduots vairuokuos Latgolys piļsātuos. “Skonai” nasataisa pagurt, partū par jim mes nūteikti dzierdēsim vēļ daudz.

Ziņu sagataveja: Rēzeknis nūvoda vokaluos studejis “Skonai” dalineica Sigita Kuzmina