Latvejis Republikys Naatkareibys atjaunuošonys dīnā, 4. majā, Rēzeknē itūgod nūtiks Draudzeibys velobraucīņs i aktivitatis vysai saimei breivā dobā, byus ari Rēzeknis Tautys teatra pyrmizruode i svineigs svātku koncerts.

Rēzeknē sporta aktivitatis niu ir veseleigs i aktivs breivuo laika pavadeišonys veids i kasdīnā, i svātkūs – tū aplīcynoj ari ito gods Rēzeknis pusmaratona lelais dalinīku skaits. Latvejis dzimšonys dīnā par tradiceju jau ir izaveiduojs tautys skriejīņs “Ieelpo Rēzekni!”, bet 4. maja svātkūs itūgod vysi rēzeknīši teik aicynuoti vīnuotīs Draudzeibys velobraucīnī, veidojūt saimu, draugu, pogolma voi īlys komandys 4-8 dalinīku sastuovā.

Draudzeibys velobraucīnī var pīsadaleit i leli, i mozi – sevkurs, kuram velosipeds ir braukšonys kuorteibā. Teik aicynuots velobraucīņam dasasaceit īprīkš, nūsyutūt aizpiļdeitu dasacejuma veidlopu iz e-postu sports@rezekne.lv, bet varēs dasasaceit daleibai ari svātku dīnā pyrms braucīņa. (Draudzeibys velobraucīņa nūlykums i dasacejuma veidlopa)

4. maja reitā nu 9.00 Atbreivuošonys alejā 93, laukumā pi Dūmis suoksīs dalinīku registraceja Draudzeibys velobraucīņam. Piec svātku uzrunu i sveicīņu 10.00 pi pīminekļa “Vienoti Latvijai“, 10.15 tiks dūts starts velobraucīņam pa Bazneicys i Raiņa īlu leidz Rēzeknis Kulturys i atpyutys parkam, kur turpynuosīs svātku programa.

No 10.30 leidz 14.00 rēzeknīši i piļsātys gosti aicynuoti īsasaisteit vysaiduos rodūšuos i sportiskuos aktivitatēs Kulturys i atpyutys parkā (Raiņa īlā 29a), kur byus atvārtys i rodūšuos darbneicys i meistarklasis, kai ari uzastuos Rēzeknis jaunīšu muzykys i deju grupys. Dorbuosīs ari amatnīku tierdzeņš, kurā varēs sevi īprīcynuot ar skaistim meistaru darynuojumim.

Tīpat preteimā parkam Raiņa īlā nu 11.15 leidz 13.30 tiks reikuotys Veiklys braukšonys sacenseibys (registraceja parkā nu 10.30, piec Draudzeibys velobraucīņa finiša), kur aicynuoti pīsadaleit dalinīki nu 7 godu vacuma i sacenseibys nūtiks trejuos vacuma grupuos: 7-10 godi, 11-14 godi i nu 15 godu vacuma.

Piecpušdīnā Rēzeknis Tautys teatris 15.00 Rēzeknis Kulturys nomā (Bruoļu Skryndu īlā 3) duovoj skateituojim pyrmizruodi “Patentēts inteliģents” – Broņislava Vaļpītra komedeju latgaliski ar dzīduošonu i doncuošonu Mārys Zaļaiskalns režijā “Kai Mikeļs precētīs gribēja” (īeja iz izruodi 2,13 i 2,85 eiro).

Vokorā Latgolys viestnīceibā GORS 19.00 nūtiks Svātku koncerts (īeja bez moksys), kurā uzastuos Andris Daņiļenko kūpā ar vītejim muzikim – pyušaminstrumentu orkestri “Rēzekne” i Rēzeknis bigbendu. Sovukuort 5. majā Latgolys viestnīceibā GORS tiks atzeimuota rakstnīka Juoņa Klīdzieja symtuo jubileja i 17.00 tiks demonstrieta dokumentaluos kinys “Juoņa Klīdzieja dabasu puse” pyrmizruode, bet piec tam – muokslys kina “Cilvēka bērns”.

Ziņa sagataveita piec Rēzeknis Kulturys i turisma centra dūtuos informacejis