Šudiņ, 3. majā, izškirūšuo finalspēle nūtyka Latvejis handbola viersleigā sīvītem, kurā sasacente Ludzys komanda SK “Latgols” i Stūpeņu NHK sportistis. Dramatiskā ceiņā (25-24) puoruokys beja Stūpeņu handbolistis, serejā svynūt uzvaru ar 2-1 i teikūt pi zalta medaļu. Sovukuort Ludzys mārgom – sudobrs.

Regularajā čempionatā SK “Latgols” ari izceineja 2. vītu, nu Stūpeņu NHK atpalīkūt par 10 punktim. Tys deve īspieju izsliegšonys spēlis suokt nu pusfinala, kur ludzānītis tykuos ar LSPA komandu. SK “Latgols” beja puoruokys ar 2-0 (26-24, 27-16), nūdrūšynojūt vītu finalā.

Finala serejis pyrmajā spēlē Ludza izmontuoja sovu sīnu prīškrūceibys, uzvarūt ar 29-20. Atbiļdis spēlē, kura vakar nūtyka Ulbrokā, Stūpeņu NHK rezultatu serejā izleidzynuoja (24-19), kas nūzeimuoja, ka izškirūšuo spēle nūtiks šudiņ. Piec leidzvierteiga ceinis suokuma pi puorsvora tyka laukuma saimineicys, pyrmū puslaiku nūslādzūt ar 15-13. Ūtruo puslaika suokuma Stūpeņu NHK puorsvors pīauga pat leidz 5 vuortu starpeibai, bet pamatlaika izskaņā ludzānītis rezultatu izleidzynuoja. Tūmār golavuords pīderēja Stūpeņu komandai, kurai ari uzvara ar 25-24 spēlē i 2-1 serejā.

Ludzys sīvīšu komanda (startējuse ar nūsaukumim SK “Latgols”, Ludzys SHK, Ludza GE Money Bank, BTB Ludza, Ludza)  Latvejis čempionu titulu ir izceinejuse jau sešys reizis, pādejūreiz 2010. godā. Kūpumā nu 1992. goda ludzānītis tik vīnu reizi (1994. godā) nav bejušys storp treis Latvejis lobuokajom komandom.

Šudiņ ASK sporta zalā ceiņu par Latvejis handbola viersleigys bronzys medaļom suoce ari SK “Latgols” veirīšu komanda, sasacenšūt ar “Celtnieks/LSPA”. Sereja leidz treis uzvarom turpynuosīs 10. i 11. majā Ludzā.

Karteņa: handball.lv