Imanta Zīdūņa fonds “Viegli” aizsuocs jaunu tradiceju – dzejnīka dzimšonys dīnys vokorā, 3. majā, padūt bolvys “Laiks Ziedonim” pīcuos nominacejuos. Storp bolvu sajiemiejim ari latgalīši – Slišānu saime i Ilga Ivanova.

Apbolvuojumi tyka padūti nominacejuos “Taureņu uzbrukums” (par sasnāgumim zynuotnē), “Bize” (par sasnāgumim rodūt, tulkojūt, vuicūt, izplotūt voi izdūdūt latvīšu literaturu), “Rabarbers” (par sasnāgumim dorbā ar bārnim i jaunīšim), “Zemi es mācos” (sasnāgumi saimnīkuošonā), “Kedas” (par sasnāgumim nūvodpietnīceibā).

Nominacejā “Rabarbers” bolvu sajēme Ilga Ivanova nu Zylupis. Jei struodoj bārnu i jaunīšu centrā, voda Pasīnis mozpulku, kai ari kūpā ar bārnim reikoj sakūpšonys tolkys i greznoj bazneicys. Ilga teik saukta par vītejū latvīteibys i patriotisma oāzi, kas vuica bārnus mīļuot sovu zemi, mīļuot Latveju.

Nominacejā “Kedas” bolvu sajēme Slišānu saime nu Upeitis. Dzejnīka i nūvodpietnīka Ontona Slišāna dorbu turpynoj juo bārni i mozbārni. Tradiceju i kulturys mīlesteiba teik nūdūta nu paaudzis iz paaudzi. Jūs davums latgalīšu kulturys atteisteibā ir naizsokams.

Apbolvuojumu zynuotnē sajēme jaunais zynuotnīks Vjačeslavs Kaščejevs, nominacejā “Bize” bolvu sajēme Latvejis Nacionaluos bibliotekys direktors Andris Vilks, bet nominacejā “Zemi es mācos” – kaļvs Jānis Nīmanis.

Apbolvuošonys ceremonejis video var nūsavērt ite, bet videosižets par vysim laureatim apsaverams ite.