Virtualais muzejs i izgleitojūšuos spēlis par Latgolys kulturys montuojumu

Virtualais muzejs i izgleitojūšuos spēlis par Latgolys kulturys montuojumu

Rēzeknis Augstškola 2012. goda rudinī paraksteja finansiešonys leigumu par projekta “Virtuālā pagātne – muzeju nākotne”  eistynuošonu i suoce dorbuotīs kai vodūšais partners, puļcejūt ap sevi cytus partnerus – Kēdaiņu Regionalū muzeju (Lītova), Maksima Bagdanoviča muzeju (Grodņa, Boltkrīveja) i Rēzeknis piļsātys dūmi, kas puorstuov Latgolys Kulturviesturis muzeju. Projekta mierkis – izveiduot virtualu muzeju i pīduovuot 4 spēlis, kas varātu byut saistūšys bārnim i jaunīšim, īpazeistūt nūvodam rakstureigū kulturmontuojumu, paverūt īspiejis leluokam cylvāku skaitam virtuali apsavērt muzejus, kai ari rodūt tim interesi apmeklēt tūs kluotīnē.

Piec intensivys vīna goda dorbuošonuos projektā ir izveiduota projekta sātys lopa: www.futureofmuseums.eu, kurā interesenti jau itūšaļt var apsavērt informaceju par projektu, projekta partnerim latvīšu, latgalīšu, lītovīšu i angļu volūdā. Tok izveiduotuo sātys lopa atsaškir nu cytom, partū ka ite var īsavērt kotra partnera izveiduotajā virtualuo muzeja galerejā, kai ari īpazeit treju vaļstu kulturmontuojumu, īsasaistūt kaidā nu datorspēlem. Pietnīkim i nūvodu viesturis interesentim aizraujūšuokū sadaļu veiduos aproksts, kas suoksīs ar Interesanti, ka…, reizem puorsteidzūt ar cīši nagaideitim faktim par it kai zynomom lītom.

Kotra partnera virtualuo galereja paruoda ari jūs darbeibys specifiku: Kēdaiņu Regionalais muzejs prezentej ar omotnīceibu saisteitu kolekceju, Latgolys Kulturviesturis muzejs atkluoj sovys leluokuos kolekcejis “Latgolys keramika” nūslāpumus, sovukuort Rēzeknis Augstškola virtualajā galerejā ir puorvārtuse izdavumu “Latgolys lingvoteritorialuo vuordineica”, pīduovojūt pietnīkim, interesentim plašu olūtu bazi par 300 Latgolys konceptim.

Nu 24. leidz 26. apreļam Rēzeknē nūtyka projekta pyrmais kulturizgleitojūšais seminars “Virtuālais muzejs: Latgales keramikas aspekts”. Seminara mierkis – testēt izveiduotuos datorspēlis, paruodeit treju vaļstu viesturis, folklorys, volūdys, literaturys saskaris punktus, puorlīcynuot sabīdreibu par muzeja pīduovuojuma i īspieju atbiļsteibu myusu dīnys sabīdreibys vajadzeibom i tehnologeju atteisteibai.

Seminarā pīsadaleja vaira kai 100 školāni, studenti, školuotuoji, pietnīki, puorstuovūt na tik projekta daleibvaļsts, nu pīduovojūt īsavērt muzeju virtualajā nuokūtnē ari Rēzeknis piļsātys dūmis sadarbeibys partnerim nu Turcejis, Ungarejis, Italejis. Dorba gaisūtne beja saspryngta, partū ka paraleli prīšklasejumim beja īspieja īsasaisteit spēļu testiešonā, izsaceit sovu redzīni, vaicuot, diskutēt. Juoatzeist, ka Rēzeknis 5. vydsškolys, Rēzeknis Vaļsts pūļu gimnazejis, Nautrānu vydsškolys, Rēzeknis Muokslys i dizaina vydsškolys školāni i Rēzeknis Augstškolys studenti aktivi izsaceja sovu redzīni, rūsynuoja iz atsevišku spēļu elementu nūmaiņu i atzyna, ka lobpruot itaidys spēlis izmontuotu vuiceibu procesā, tuos īsaceis ari sovim draugim kai izgleitojūšu i saistūšu materialu.

Datorspēlis ir veiduotys tai, lai na tik rūsynuotu interesi par nūvoda kulturviesturi, konkretuo muzeja ekspoziceju, bet ari lai tuos izmontuotu vysaidim izgleitojūšim i rodūšū darbeibu veicynūšim mierkim. Kēdaiņu Regionaluo muzeja spēle, kai atzyna ari testietuoji, vaira īinteresēs tūs, kas gryb izzynuot par sātu ceļtnīceibu, senejuos omotnīceibys īspiejom, tuos sarežgeiteibys pakuope nav tik augsta, partū eipaši īsokama 7.–9. klasis školānim, vuicūtīs nūvoda viesturi, muojtureibu, ari biznesa pamatus. Rēzeknis Augstškolys spēle ir sarežgeituoka i prosa nūteiktu zynuošonu leimeni par Latgolys kulturviesturi, volūdu, folkloru, partū tū īsaceitu spielēt vydsškolānim, studentim, tim, kas gryb īsavuiceit latgalīšu volūdu. Sovukuort Latgolys Kulturviesturis muzeja spēle ir rodūšuokuo, tei pīduovoj byut par virtualū pūdnīku, partū spielejama sevkurā vacumā, natīšai mudynojūt kotru spielietuoju izzynuot vaira par keramika dorba specifiku.

Projekta pietnīki (V. Banīs, V. Sedeika, S. Ūdre, I. Šuplinska, I. Atpile-Jugane, E. Vasilevska) uzrunuoja kluotyn asūšūs, pastuostūt sovys puorstuovātuos institucejis virtualuos galerejis koncepceju. Saleidzynojūšā aspektā tyka īzeimietys kūpsakareibys latvīšu, boltkrīvu, latgalīšu, lītovīšu volūdā (S. Ūdre), internacionali folklorys motivi i etniskys detalis (I. Šuplinska), lītiškuos muokslys saskaris punkti (V. Banīs, E. Vasilevska), tai rūsynojūt paplašynuot kūpejū pietnīceibys tematiku, vieršūt viereibu iz baltu kulturys nūzeimeibu itymā pīrūbežu arealā. Pīsaceitī pietejumi īzeimoj tematiku tuoluokajom diskusejom i aktivitatem, kas plānuotys leidzeiga satura seminarūs Lītovā i Boltkrīvejā.

Seminars nūtyka Pūdnīku dīnu ītvorūs, partū projekta dalinīkim i vysim interesentim beja breineiga īspieja puosalīcynuot par pietnīku i spēļu veiduotuoju atzynumim ari rodūšajuos darbneicuos i Latgolys pūdnīku paraugdemonstriejumūs. Projekta dalinīki atzineigi nūviertēja Latgolys Kulturviesturis muzeja programu “Māla pikuča piedzīvojumi”. Pīsadaleja i reducietuos, i glazietuos keramikys cepļa kurynuošonā i izjimšonā.

Projekta aktivitatis turpynuosīs majā Lītovā, septembrī – Boltkrīvejā, bet 20.–22. novembrī otkon atsagrīzs Rēzeknē, lai projekta nūslāguma konferencē apkūpuotu projekta rezultatus i literari muzykalā Andrejdīnu pasuokumā apjaustu pīrūbežys partneru sadarbeibys spāku i lītdereibu ari jaunom projektu idejom.

Ziņa sagataveita piec projekta vadeituoja Ingara Gusāna dūtuos informacejis
Karteņa: Māris Justs

Print Friendly, PDF & Email

Kalenders

Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]