Rēzeknis Tautys teatris jubileju svietej ar pyrmizruodi

Rēzeknis Tautys teatris jubileju svietej ar pyrmizruodi

Latvejis Republikys Naatkareibys atjaunuošonys dīnā, 4. majā, Rēzeknis Tautys teatris skateituojus aicynuoja iz pyrmizruodi latgaliski “Patentēts inteliģents” aba “Kai Mikeļs precētīs gribēja”. Leidz ar  Bronislava Vaļpītra komedejis pyrmizruodi Mārys Zaļaiskalns režijā Rēzeknis Tautys teatris svieteja sovu 55. jubileju, duovojūt skateituojim prīcu i preteimā sajamūt boguoteigus aplausus.

Rēzeknis Tautys teatra darbeiba suokusēs 1959. godā, bet teatra pyrmsuokumi Rēzeknē vaicojami daudz ogruok. Nu 1973. goda teatra režisore ir Māra Zaļaiskalns, kurys vadeibā pādejūs 20 godu laikā ir īstudietys jau vaira nakai 25 izruodis. Vairuokus godus rēzeknīši dabuojuši apbolvuojumus Latvejis amatīrteatru īstudiejumu skatē “Gada izrāde”, sajemūt atzineibys i par lobuokū izruodi, i režiju, kai ari scenografeju.

Nu 2000. goda Rēzeknis Tautys teatris organizej teatru festivalu “Soli pa solim”, aicynojūt gostūs iz Rēzekni teatrus nu Latvejis i cytom zemem, taipat ari rēzeknīši pīsadola vysaidūs Storptautiskūs teatra festivalūs (“Baltijas rampa”, “El Pati” i cytūs), i ar izruodem ir bejuši na tik gondreiž vysuos Latvejis piļsātuos, bet gastejuši ara Lītovā, Vuocejā, Krīvejā, Dānejā – Fareru soluos, Spānejā, Austrejā, Tunisejā, Beļgejā, Italejā, Turcejā i cytur.

Jemūt vārā, ka pyrmizruodē zals beja puorpiļdeits i publikys atsauceiba īdvasmojūša, pavysam dreiž – 15. majā 18.00 Rēzeknis Tautys teatris otkon aicynoj iz izruodi “Patentēts inteliģents” aba „Kai Mikeļs precētīs gribēja”.

Informaceju sagataveja: Jeļena Maruka, Daugovpiļs Universitatis studeju programys “Starpkultūru attiecības” studente
Karteņa: Maija Upeniece

Print Friendly, PDF & Email

Kalenders

Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]