Grupa „Bez PVN” pīvuovoj nūsaklauseit jaunuokū grupys dorbu – dzīsmi „Loopi”, kas īzeimej aizsuoktū dorbu pi nu jau trešuo grupys albuma.

Pārn izdavuši ūtrū albumu „Reits”, par kurū sajiemuši nominaceju Latvejis Muzykys īrokstu Goda bolvā „Zelta mikrofons” pop-rock albuma kategorejā i Latgalīšu kulturys Goda bolvu „Boņuks” par lobuokū snāgumu 2013. godā, nūsvietejuši desmit godu jubileju i snēguši jubilejam veļteitūs koncertus, grupa „Bez PVN” itūgod aizsuok dorbu pi trešuo albuma i kotram interesentam pīduovoj nūsaklauseit dzīsmi „Loopi”. „Loopi” ir gon stuosts par kotra cylvāka dzeivis kasdīnys cylpom, izaicynuojumim i paradoksim, nu reizē tei ir ari volūdys spēle, jo angliskais „loopi” latgaliski saprūtams kai „lūpi”.

„Loopi” ir pyrmuo dzīsme nu itūgod izdūt paradzātuo nu jau trešuo grupys albuma. Pyrmais albums – bleivplata „Pyrms vuorda” izguoja 2006. goda golā, nu „Reits” 2013. godā tyka izdūts magnetiskuos lentis i digitalā formatā. Leidz ar kotru albumu mainejīs ari grupys skaniejums – nu roka i roka ar tautiskuos muzykys īzeimem da plašuokam instrumentu lītuojumam, spieliešonai ar bolsim i folk nūkruosom, nu izteiksmis volūda – latgalīšu – gon palykuse namaineiga.

Dzīsmis „Loopi” muzykus i vuordu autors ir Kristaps Rasims, kai muziki-gosti īrokstā pīsadalejuši Arturs Uškāns (stabule, kuline), Kaspars Stankevičs (trompete, alts), Mārcis Runka (trompete). Dzīsme īraksteita studejā „Reiga”, mix i master – Uģis Vilcāns.

Grupys sastuovā muzicej Kristaps Rasims (elektriskuo gitara, bandžo, bolss), Guntis Rasims (akustiskuo gitara, bolss, trompete, akordeons), Valdis Vucāns (basgitara, bolss), Jurs Vucāns (tausteni, samplers, gitara, bolss) i Normans Bārbals (bungys).

Majs „Bez PVN” īsasuocs ar koncertim Rēzeknē i Reigā, nu pavasara/vosorys sezonā vēļ paradzātys uzastuošonys Lītovā (Rokiški, 31. majs), Rēzeknē (festivals „SEVENHILLS”, 1. juņs), Leiksnā (festivals „Muzykys Skrytuļs”, 5. juļs), Rēzeknis nūvodā (Rēzeknis nūvoda svātki, 19. juļs), Baļtinovā (festivals „Osvalds”, 9. augusts).