Rogovkā nūtiks fotografa Juoņa Gleizda pīminis pasuokumi

Rogovkā nūtiks fotografa Juoņa Gleizda pīminis pasuokumi

18. majā Nautrānu pogosta Rogovkā nūtiks fotomuokslinīka, Treju Zvaigžņu ordiņa kavalera Juoņa Gleizda 90 godu jubileja atceris pasuokumi. 10.00 sevkurs interesents ir aicynuots pīsadaleit fotografa pīmiņai veļteitajā Svātajā Mišā Nautrānu Svātuos Jaunovys Marijis bezvaineiguos ījimšonys Rūmys katuoļu bazneicā. 11.30 paradzāta J.Gleizda fotoizstuodis atkluošona Nautrānu sporta hallē-kulturys nomā. Īeja iz vysim pasuokumim – bez moksys.

Īvāruojamais fotomuokslinīks dzims 1924. goda 7. majā Rēzeknis apriņča Iļžukolna pogosta Vacgailumūs. Ar fotografeju jis suoce nūsadorbuot 1951. godā. Vysaiduos izstuodēs jis pīsadalejs nu 1962. goda, puors godus vāluok suoce pīsadaleit ari storptautiskajuos izstuodēs. Pyrmuo nūzeimeiguo personalizstuode nūtyka 1977. godā Reigā.

Puorsvorā Juoņs Gleizds struoduoja malnboltajā fotografejā, meistareigi izmontojūt sarežgeitū izohelejis tehniku. Īspiejams, vyslobuok zynomys Juoņa Gleizda sīvīšu aktu fotografejis, tok jis dorbuojīs ari cytūs žanrūs – ainovā, klusajā dobā, portretu fotografejā.

Nasaverūt iz tū, ka pādejūs godus J.Gleizds beja cīši slyms, juo fotografeju kolekcejis tyka eksponietys Lītovā, Rumanejā i Ukrainā. Pādejuo izstuode “Jāņa Gleizda atgriešanās mājās” 2009. goda rudinī beja kai atvodu sveicīņs Lendžu pogostā.

Juoatzeimoj, ka 24 godu vacumā fotografu beja pīmeklēja lela nalaime – piec smogu apsaļdejumu jam tyka amputātys obejis rūkys. Ituo īmasla dieļ muokslinīka dzeive i rodūšais myužs vysā tuo garumā beja kai spylgts cylvāka grybysspāka i dzeivisspora aplīcynuojums.

Informacejis olūts: rezeknesnovads.lv

Kalenders

Feb
19
Tre
11:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Feb 19 @ 11:00 – 12:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]