Pyrms divdesmit godu aizasuokuse Daugovys svātku tradiceja dobys parkā “Daugavas loki” turpynojās ari itūgod. 25. majā Daugovpiļs nūvoda Naujenis pogosta Slutišķu cīmā ar plošu svātku programu nūtiks Storptautiskais tautys muokslys festivals  “Augšdaugava 2014”.   

Daugovys svātku nūrisis aizasuoce 1994. goda 14. majā, kod Daugovpiļs rajona padūme sadarbeibā ar Latvejis Kulturys fondu i Daugovpiļs Universitati atkluoja Markovys  izzinis stygu, kluotyn asūt tūreizejam vaļsts prezidentam Guntim Ulmanim.

Ituo gods festivala vadmotivs ir Lelais Augšdaugovys musturdečs, kura darynuošonu 2011. godā suoce Naujenis Nūvodpietnīceibys muzejs  ar  mierki  izveiduot leluokū musturdeču Latvejā, īsaisteit tuo veiduošonā piec īspiejis vaira dalinīku i tikt Ginesa rekordu gruomotā. Itūšaļt ap 70 metru garajā audaklā sovus musturus īzeimiejuši vaira nakai 2300 cylvāku nu vysys Latvejis. Braucūt iz festivalu, teik aicynuots jimt leidza fragmentu Lelajam  musturdečam, kas darynuots nu vysaidu kruosu i veidu dīgu sevkurā tehnikā (adejums, tamboriejums, mazgluojums, izmāri 10x10cm voi 20×20 cm).

Dalinīki i gosti teik laipni aicynuoti sagaideit vosoru gleznainajūs Daugovys krostūs i giut prīcu aktivitatēs, kam cauri veisīs rokstu i zeimu dažaideiba. I leli, i mozi varēs pīsadaleit rodūšajuos darbneicuos, vaicuot sev atbylstūšuokuos zeimis, īsavērt Daugovpiļs nūvoda  i puornūvodu audieju rokstūs. Koncerti skanēs  latvīšu, krīvu, angļu, itaļu, lītaunīku volūduos, partū ka festivals “Augšdaugava” itūgod nūteik ar Daugovpiļs nūvoda dūmis i Eiropys Savīneibys programys “Eiropa pilsoņiem” projekta  atbolstu. Projektā  “Pilsētu un vecpilsētu tēla atjaunošana” sasadorboj Islys pošvaļdeiba (Malta), Fara San Martino pošvaļdeiba (Italija),  Zarasu rajona pošvaļdeiba (Lītova) i Daugovpiļs nūvoda Kulturys puorvaļde ar mierki izzynuot Eiropys vaļstu i pošvaļdeibu pīredzi Ūtruo pasauļa kara izraiseitūs kulturys montuojuma pūstejuma saku puorvariešonā, īsapazeit ar atbolsta pasuokumim vītejūs sabīdreibys  kūpīnu  ekonomiskuos i rodūšuos aktivitatis palelynuošonai, kas mozynuotu īdzeivuotuoju aizplyusšonu nu regionu.

Programa “Eiropa pilsoņiem” atbolsta sabīdreibys  leidzdaleibu  kulturys i muokslys aktivitatēs, pasasokūt tam Storptautiskuo tautys muokslys festivala “Augšdaugava” programā varēs īpazeit folkmuzykys grupu “Aurora” nu Maltys, tautys deju kolektivu nu Italejis i Zarasu kulturys centra lītaunīku tautys muzykys kapelu “Čir-vir-vyrai”.

Programa

10.00 Dīvkolpuojums Spruktu bazneicā

Slutišķu sādža

12.00 – 16.30

Izstuode “Daugavpils novada musturdeķis”. Rodūšuos darbneicys – Leluo musturdeča veiduošona, glīmiezeišu izgataveišona, “Dzīparu namiņš”

Darbneicys bārnim i pīaugušajim “Zīmju un rakstu tulkotava”

Nu 12.00  Daugovpiļs nūvoda turisma pakolpuojumu izstuode

Omotnīku i ražuotuoju tierdzeņš, omotu i prasmu demonstriejumi, darbneicys, tierguošona

Latgolys sāta

12.00  Leluo musturdeča sagaideišona pi Daugovys

12.15 Festivala atkluošona “Sveiciens Augšdaugavai!”

13.00 Dīnys koncerti

17.00 Nūslāguma koncerts “Eiropas rakstu raksti”

Slutišķu vacticeibnīku sāta

nu 12.00 bārnu muokslys školu izstuode “Mana laika zīme”.

Dacis Pudānis gobelēnu izstuode, Dacis Teivānis austūs jūstu izstuode

12.00 – 16.00 Nūvoda muzeju rodūšuos darbneicys

13.30 Koncerts “Jo dziedāju, jo skanēja Daugaviņas maliņā”

Sporta aktivitatis pi Latgolys sātys

13.00 – 16.00 Vyzynuošonuos i saceņseibys ar kanoe laivom i smaileitem, saceņseibys bolkys svīsšonā, akmiņu gryusšonā, riņdžu svīsšonā, pļovys volejbols.

Vyzynuošonuos ar zemnīku saimisteibys “Klajumi” zyrgim, EUR 3,00

 10.00 – 17.00 Naujenis nūvodpietnīceibys muzeja apmekliejums (īejis moksa pīaugušajim EUR 1,14 , bārnim, pensionarim EUR 0,43)