“Maja vokorā atnuoc pi krysta…”

“Maja vokorā atnuoc pi krysta…”

Ar itim Ontona Matvejāna  dzīsmis vuordim Drycānu goreigūs dzīšmu ansamblis “Almus”  aicynuoja dzīdūšūs draugu kolektivus, komponista rodus, leidzgaitnīkus i vītejūs drycānīšus iz komponista pīminis pasuokumu. Maja mieness nav ni O.Matvejāna dzimšonys, ni aizīšonys laiks, bet pyrma sešu godu najauši  izraudzeits laiks (varbyut ar Dīva ziņu?), kod ar dzīsmem i lyugšonom gūdynojam juo pīmiņu.

25. maja reitā vysi sasapuļcēja Drycānu kopsātā, aizlyudze i nūlyka zīdus iz O.Matvejāna kopa kūpenis. Sekuoja Sv.Mišs Drycānu R.K. bazneicā, kū celebrēja myusu draudzis prāvests Māris Laureckis, bet piec Miša – koncerts. Itūgod pīminis pasuokumā pīsadaleja dzīduotuoji nu Styglovys draudzis – Mērdzinis sīvīšu kors “Austra”, dirigente Ināra Dovgiallo, Bieržu draudzis goreigūs dzīšmu ansamblis “Sonāte”, vadeituoja Aija Ikstena, Gaigolovys folklorys kolektivs “Gaigalas” i Drycānu goreigūs dzīšmu ansamblis “Almus”, vadeituojs Juoņs Trūps. Pasuokumā eipaši tyka atzeimuota O.Matvejāna i naseņ myužeibā aizguojušuos dzejneicys Emilejis Kalvānis sadarbeiba. Kai nazkod atzyna poša dzejneica, juos dzejūli izguoja tautā, pasasokūt Matvejāna muzykai. Ināra Dovgiallo ar pateiceibu atguoduoja Atmūdys laiku, kod komponista izdūtuo pyrmuo goreigūs dzīšmu gruomota “Kai bolta sudobra dzejteņa” beja ceļveds i dzīšmu materiala olūts vysim Latgolys bazneicu varganistim. Anna Matvejāne, pasasaceidama par emocionali pīpiļdeitū, goreigi boguotū i sirsneigū pasuokumu, ar gandarejumu  atzeimuoja, ka O.Matvejāna dzīšmu montuojums Drycānūs nu ir nūdūts jaunuos, drūšuos rūkuos – jau godu Drycānu bazneicā muzicej jauns varganists Juoņs Trūps. Kotru svātdīni varganists i ansamblis “Almus” ar dzīsmem i goreigim dzīduojumim kuplynoj Sv.Mišu.

Paļdis vysim par svieteigi aizvadeitū dīnu – par lyugšonom, dzīsmem, sirsneibu!

Ziņu sagataveja: Ināra Orlova, pasuokuma organizatore

Print Friendly, PDF & Email

Nūtikšonu kalendars

Nov
7
Sai
16:00 Catūrtais pasauļa diktats latgal... @ Vyss pasauļs
Catūrtais pasauļa diktats latgal... @ Vyss pasauļs
Nov 7 @ 16:00
Catūrtais pasauļa diktats latgalīšu rokstu volūdā @ Vyss pasauļs
Diktats skanēs 7. novembrī 16 stuņdēs jaunīšu raidejumā “Pīci breinumi” vysuos Latvejis Radejis 5 frekveņcēs, tū varēs klauseitīs ari škārsteikla platformuos pieci.lv i lsm.lv, kai ari Latvejis Radejis Latgolys studejis i portala lakuga.lv kontūs socialajūs[...]