Leigū vokorā aicynoj iz Rēzekni

Leigū vokorā aicynoj iz Rēzekni

Itūgod rēzeknīši i gosti Leigū svātkūs – 23. juņa vokorā – teik aicynuota leiguot pi gunkura Festivala parkā (Piļs ūļneicā 7, Rēzeknē), kur sevkurs varēs rūtuotīs ar Juoņuzuolem i mīluotīs ar lauku lobumim, bet drūsmeiguokī varēs paraudzeit piertī pērtīs pošā piļsātys centrā, lai piec tam leiguotu leidz sauļlāktam kūpā ar Latgolys šlāgermuzykys grupu “Baltie lāči”.

23. juņa pušdīņlaikā Rēzeknis Festivala parkā puļcēsīs vītejī tierguotuoji Zaļajā tierdzeņā, kur varēs izgaršuot i īsaguoduot Juoņu sīru i sātys olu Leigū svātku goldam.

Nu 14.00 vysa saime teik aicynuota īsasaisteit vairuokuos rodūšajuos darbneicuos – varēs vuiceitīs peit Juoņu vaiņukus i tikt pi jaunu zynuošonu par zuoļu čajim, kūpā ar saimineicom katleņā iz gunkura gatavēt i sasīt Juoņu gordumgordu sīru voi sasīt svaigu pierts slūteņu i tīpat Rēzeknis upis krostā īt pērtīs pierteņā. Myusu dīnuos vyss ir īspiejams – ari originala pierteņa iz ritiņu pošā piļsātys centrā – puorsteigums garumguojiejim, nu mīsys atteireišonys vareiba pierts lobumu baudeituojim, kas dorbuosīs leidz pat vālai naktei.

20.00 Rēzeknis Tautys teatris prīcynuos ar BronislavaVaļpītra izruodi “Patentēts inteligents” aba “Kai Mikeļs precētīs gribieja” Mārys Zaļaiskalns režijā. Komedeja latgaliski ar dzīduošonu i doncuošonu stuosta par Mikeli, kurs tik cīši gryb precētīs, bet izradzātuo ir cīma smolkuokuo jaunkundze, kura par preciešonūs i nadūmoj, bet, ka preciešūtīs – zyna saceit školys saimineica – tod tik ar “telegentu personu”. Kas tys ir un kai lai taidu daboj? Kur vuškys, tī cierpieji! I par paleigim i padūmdeviejim naivajam i paslynkajam, nu uzjiemeigajam lauku puišam pīsasoka i Pabyru partejis vītejuos nūdalis dybynuotuojs Misiņa kungs, i veiklī tiergūni Abrams ar kundzi, i cyti lobvieli.

Iz reizis piec izruodis nūtiks sasadzīduošona kūpā ar folklorys kūpu “Rūta”, kas Leigū dzīsmis izdzīduojuse jau 30 godu garumā i vys vēļ, mainūtīs paaudzem, namaineigi turpynoj īleiguot laukus i piļsātys ar dzīsmem.

Juoņuguņs Rēzeknē īsadegs kūši i kruošni  – gunkurs byus “ītārpts” vītejuo muokslinīka Gundara Kozlovska guņsskulpturā “Latvju raksti”, kas īsamirdzēs puori pakolnim i speidēs leidz pat reita gaismai. Sovukuort Leigū nakts zaļumbalā ar tautā īmīļuotom i popularom dzīsmem prīcynuos Andris Baltacis i grupa “Baltie lāči”, ļaunūt ļustēt i izbaudeit saulgrīžu mistiskū nūskaņu.

Vysa pasuokuma programa bez moksys.

LiigoRezekne_2014_afisa

Ziņa sagataveita piec Rēzeknis Kulturys i Turisma centra dūtuos informacejis

Print Friendly, PDF & Email

Nūtikšonu kalendars

Nov
7
Sai
16:00 Catūrtais pasauļa diktats latgal... @ Vyss pasauļs
Catūrtais pasauļa diktats latgal... @ Vyss pasauļs
Nov 7 @ 16:00
Catūrtais pasauļa diktats latgalīšu rokstu volūdā @ Vyss pasauļs
Diktats skanēs 7. novembrī 16 stuņdēs jaunīšu raidejumā “Pīci breinumi” vysuos Latvejis Radejis 5 frekveņcēs, tū varēs klauseitīs ari škārsteikla platformuos pieci.lv i lsm.lv, kai ari Latvejis Radejis Latgolys studejis i portala lakuga.lv kontūs socialajūs[...]