Jau reit, 12. junī, Reigā, “Dirty Deal Teatro” nūtiks jaunuos dramaturgejis lasejumu “10 min slavas” finals, kurā pīsadaleis pīcu regionalūs atlašu uzvarātuoju, tymā skaitā ari Latgolys puorstuovs Raibīs (Oskars Orlovs).

Jau divejus godus myusdīneigys Latvejis dramaturgejis radeišonu veicynuojs jaunu lugu ideju konkurss “10min slavas”: reizi mienesī “Dirty Deal Teatro” telpuos puļcējuos interesenti, kab dzierdātu svaigys idejis, jaunus autorus, kuri gryb redzēt sovus tekstus izspālātus iz Latvejis skotuvem. Konkurss tyka pi atzeistamys īviereibys i partū itamā sezonā “10min slavas” guojs plošumā – konkurss nūtyka vysūs Latvejis nūvodūs, tai dūmūt vareibu izasaceit ari tūs, kas leidz Reigai natyka. Na mozuok byutiski, ka konkursa klauseituoji vysupyrma beja nūvodu ļauds, bet 12. junī lobuokuos idejis skanēs konkursa finalā “Dirty Deal Teatro”, kad kotra nūvoda klauseituoju bolsuošonā izvālātais uzvarātuojs ar sovu lugu īpazeistynuos jau plošuoku interesentu i teatra profesionaļu lūku. Īīšona pasuokumā bez moksys.

Finalā pīsadaleis Justīne Kļava nu Reigys, Aleksandra Lielās nu Kūrzemis, Aiva Birbele nu Vydzemis, Una Nākuma nu Zemgalis i Raibīs nu Latgolys.

Raibuo lugys “Shortcut” darbeiba nūteik pasažīru tuolsatiksmis viļcīnī. Lugys centrā ir jauns veirīts, kurs viļcīņa kupejā sateik vysaidus cylvākus, kas ītekmej juo izpratni par dzeivi i tuos jāgu.