Baļtinovā jau deveņpadsmytū reizi nūtiks festivals “Osvalds”

Baļtinovā jau deveņpadsmytū reizi nūtiks festivals “Osvalds”

9. augustā  Baļtinovā  19. reizi tiks reikuots muzykys festivals “Osvalds”. Tys ir vysvacuokais muzykys festivals Latgolā, kas pastuov i itūšaļt. Godu gaitā ir bejuši i  kuopumi, i krytumi, nu tok “Osvalds” vys vēļ ir dzeivs i cytugod gatavej svieteit 20 godu pastuoviešonys jubileju. Tei īcarāta, kai jau itaidūs gadīņūs paradzāts, ar plašuoku programu, kai ari cytom intrigejūšom i novatoriskom lītom.

Ituo gods festivals nūtiks tradicionalā gorā. Teik saglobuots 3 vīnlaiceigi dorbojūšūs skotuvu formats ar dominejūšim pop, šlāger, rock i elektroniskuos muzykys vierzīnim. Kotram nu itim stilim “Osvaldā” ir sovi pīkritieji, partū teik raudzeits radeit vareibu kotram apmaklātuojam atrast koč kū sev interesejūšu.

Iz Tradicionaluos skotuvis tiks pīduovuota vareiba redzēt Latvejā pazeistamus pop i šlāgermuzykys izpiļdeituojus, kai ari vairuokys tyvuokuos apleicīnis rok grupys. Tī ir –  Musiqq, Liene Šomase i Jānis Moisejs, Mākoņstūmēji, Bez PVN, Tranzīts, Napruots, Elektrolīts. Programys vadeituojs Zigfrīds Muktupāvels.

Ūtruo – Zaļumbala skotuve byus atvālāta šlāgermuzykai, kas nūteikti ir vyspopularuokais muzykys stils itymā apvydā. Itei muzyka breineigi īsader kūpejā atmosfērā, ar sovu pozitivismu rodūt zaļumbala atmosferu. Kur vēļ cytur tū izbaudeit, ka na eistūs laukūs kūpā ar sirsneigim i jautrim muzykantim nu grupom Galaktika, Vilx, Kreisais pagrieziens, Rolise,  Otto, kai ari Aināru Lipski i Juoni Keišu.

Trešuo nūrisis vīta –  Elektroniskuos muzykys skotuve vīnnūzeimeigi ir ījāmuse stabilu vītu festivalā, kur azartiska dīdžeju uzastuošona sasavīnoj ar īspaideigu skanis, video i gaismys šovu. Tys pretieji  jaukajai zaļumbala atmosferai ir piļneigi kontrastejūši, bet kūpsummā veidoj daudzpuseigu i kruosainu festivala programu. Ituos skotuvis programu itūgod nūdrūšynuos- DJ Mārtiņš Kreilis (European Hit Radio), Badly Furnished Room Dj TRIO, Dj Čivix, Dj Barik, Dj Andre White, Dj BumbleBeat, Dj NuFreak

Festivala nūrisis laiks 9. augusts 20.00 – 04.00. Beletu cenys īprīkšpuordūšonā Eur 6.00, iz vītys Eur 10.00.

Beleti nūpierkami:www.bilesuparadize.lv

 Karteņa: Edeite Husare

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]