12. junī Reigā nūtyka jaunuos dramaturgejis skaitejumu “10 minūtes slavas Latvijā” nūslāguma skaitejumi, kurūs pīsadaleja vysi īprīkšejūs skaitejumu uzvarātuoji nu pīcu regionu – Justīne Kļava (Reiga), Aleksandra Lielās (Kūrzeme), Aiva Birbele (Vydzeme), Una Nākuma (Zemgale) i Raibīs (Latgola). Par uzvarātuoju tyka atzeits Rēzeknis Augstškolys studeju programys “Filologeja” 3. kursa students Oskars Orlovs aba Raibīs ar lugu latgalīšu volūdā “Shortcut”.

Lugys “Shortcut” darbeiba nūteik pasažīru tuolsatiksmis viļcīnī. Stuosta centrā ir jauns veirīts, kurs viļcīņa kupejā sateik vysaidus cylvākus, kas ītekmej juo izpratni par dzeivi i tuos jāgu. Par izvālātū lugys nūsaukumu autors stuosta: “Deļkam Shortcut?! Viļcīņa ceļš kai dzeivis ceļš. Ar suokumu i sagaidamom beigom. Te mes poši (ceļā) sateikom īrūbežuojumus i normys, voi ari – koč kas tū paleidz izdareit. Sateikom lobus draugus, pazinis, zynomus cylvākus i svešinīkus. Kotrā attīceigajā situacejā mes reagejom dažaidi. Bet, kai zynoms, ikkotrs, sevkurs, taiduos situacejuos reagej pa sovam. To tei ir gribiešona pasadižuot, to palikt pīlaideigam i paklauseigam kai jāram, to draugu storpā izrīzt kryutežu i palikt bravureigam, tok tym pat šaļtī – lātam. Sovs laiks īkuopt dzeivis viļcīnī, sovs laiks nu tuo izkuopt. I, kai tod ir? Voi mes gola stacejā īsarūnom taidi, kai bejom? Voi kas nibejs pasamaina konkretajuos tikšonuos i sarunuos, puordūmuos, ikdīnys maskuos i sabīdreibys pieškiertajūs titulūs?”

Kai konkursa uzvarātuojs Raibīs dabuoja naudys bolvu, sajēme vysaidus īteikumus lugys uzlobuošonā. Autoram īsaceja parunuot ar Daugovpiļs teatra puorstuovim, lai jī īstudej jaunradeitū lugu “Shortcut”.

Atsokūt iz vaicuojumu, voi konkretais lugys pabeigšonys termeņš natraucēja rodūši struoduot,  lugys autors soka: “Saucamī “deadline” beja gon. Bez jim nikas nanūtyktu. Tys lyka puorsavērt sovu dorbu grafiku i pakuortuot tūs lugys raksteišonai. Tai es div nedelis pavadeju nūmaļuokuos vītuos, kur nav sabīdreibys, kur ari tū lugu raksteju.”

Raibīs aktivi dorbojās literaturys lauceņā – 2011. godā izguoja juo gruomota “Pyrma syltī”. Juo teksti ir atrūnami audio diskā “Ķēniņmeita. Latgales pasaka.”, kas izskanēja Latgolys viestnīceibys GORS atkluošonys pasuokuma prīšknasumā. Runojūt par sovim nuokūtnis planim, Raibīs atkluoj, ka ir sajiems VKKF rodūšū stipendeju, partū niu raksteis stuostus sovai stuostu gruomotai “Zalta tesmini”. Taipat jis roksta tekstus projekta “KAPĻI” jaunajom dzīsmem. “Varbyut kod na kod jim izīs ūtrais albums,” soka Raibīs.

Ziņu sagataveja: Inga Kaļva, Rēzeknis Augstškolys Sabīdryskūs attīceibu nūdalis informacejis specialiste