6. julī 18.30 LTV1 suoksīs raidejuma “Cytaidi latviskais” ūtruo sezona, i tai vysu vosoru kotru svātdīni kūpā ar latgalīšu dzejnīku Valentinu Lukaševiču byus vareiba sasatikt ar puorsteidzūšim cylvākim. Ūtruos sezonas raidejumu pamatā personeibys i dzymtys, kas Latgolā kūp kaidu nūteiktu profesionalū vidi, orūdu, omotu, ir daļa nu latgaliskuos pošapzinis, nūvoda tradicejis i veidoj tū eipašū kodu, kū Latvejā saprūt ar vuordu salykumu “latgaliskais patriotisms’’ – ituo raidejuma kontekstā ari “cytaidi latviskais’’.  

Puorsteidzūšā kuortā ir tai, ka videjais statistiskais latvīts, ari latgalīts, vaira zyna par Senejuos Grīkejis i Rūmys kulturu, franču literaturu voi britu muzyku nakai latgalīšu kulturu. Voi zynot, ka pyrmuo gruomota latgaliski izguoja 1756. godā, ka latgaliski ir publicieti tyukstūšom dzejūļu, symtim stuostu, desmitim romanu? Latgola ir cīši tyvu, nu reizē ari cīši tuoli. Par Latgolu ir izaveiduojs pulka stereotipu, parosti pretieju: Latgolā volda bezdorbs, alkoholisms, dzeivoj panaivi i kūtri cylvāki; te vysi dzīd, doncoj, ir labesteigi i ar prīcu uzjam gostus.

Pasavērt iz Latgolu cytaižuok, izavairūt nu itim pretejim stereotipim. Paruodeit Latgolu vīgli, atraktivi, nu reizē ari dzili i pamateigi. Zynūt, ka navar aptvert naaptveramū, ar puors precizim, suleigim trīpīnim paruodeit cylvākus, situacejis, fenomenus. Itaids treisdaleigs viersmierkis ir 10 videostuostu cyklam “Cytaidi latviskais”.

Latgalīši – tī ir tī poši latvīši, tik cytaidi. Taišni partū stuostu serejai ir taids nūsaukums; tys pajimts nu Valentina Lukaševiča pyrms 9 godu sacarāta dzejūļa viersroksta. Raidejuma scenareja i idejis autori- latgalīšu dzejnīks, pedagogs Valentins Lukaševičs i LTV redaktore Sandra Freiberga, režisore Svetlana Rudzeite,  operators Egils Kurpnīks, pasasoka Latgolys nūvodam par atsauceibu i arī augstū nūviertiejumu, partū ka projekts sajēme Latgolys 2013. goda Kulturys bolvu Boņuks- nominacejā “Goda sasnāgums audiovizualajā muokslā’’ i ari NEPLP nominaciju “Calmlauža bolvai’’ 2013. godā.

Ziņa sagataveita piec LTV informacejis
Karteņa: ltv.lv