4. julī 13.00 nūtiks Rēzeknis Augstškolys (RA) jaunuos Inženeru fakultatis ākys atkluošona. Tamā pīsadaleis augstškolys vadeiba, LR Ministru prezidente Laimdota Straujuma, v.e. Juoņs Buļs, studenti, absolventi, sadarbeibys partneri.

Tei ir pyrmuo āka Rēzeknis Augstškolys pastuoviešonys laikā, kura sovu dīnys gaismu īraudzejuse, izaugūt nu projekta iz papeira leidz myusdīneigai ceļtnei Rēzeknis piļsātā.

Inženerzynuotņu korpuss ir na tik pīviļceiga āka, bet ari saturiski pīpiļdeita – 17 laboratorejis, kuruos izvītuotys modernuokuos īkuortys Baļtejā, varēs ilgi kolpuot i studentim, i pietnīkim, i uzjiemiejim.

Telpu izkuortuojums i funkcionalitate piļneibā atbylst myusu dīnu praseibom – ākā dorbojās lifti, tei ir pīlāguota cylvākim ar funkcionalim trauciejumim, daslāgta augstys klasis ventilacejis sistema, kura nūdrūšynoj klimata kontroli. Izveiduots konferenču zals, kura prīškrūceibys nūviertēs na tik myusu pošu docietuoji, nu ari daudzi uorvaļstu sadarbeibys partneri, partū ka konferenču zalā varēs reikuot attuolynuotuos apsprīdis ar škārsteikla starpnīceibu. Naatjemama sastuovdaļa studentu i zynuotnīku darbeibā ir bibliotekai. Apmaklātuoju parūceibai ir telpys, kas ļaun dorbuotīs publiski pīejamā laseitovā, kai ari ir vareiba struoduot atseviškuos telpuos individuali.

Pasasokūt ERAF projektam “Rēzeknis Augstškolys jaunys Inženeru fakultatis, laboratoreju byuvnīceiba i īkuortu īguode” (identifikacejis nr. 2010/0117/3DP/3.1.2.1.1./09/IPIA/VIAA/028), kura izstruode aizasuoce 2010. godā, studenti varēs studēt modernā vidē, praktizētīs, eistynuot sovys idejis dzeivē.

Kūpejais projekta finansiejums ir 6 789 521 latu, no kurim 85% ir ERAF finansiejums, 7,17% vaļsts finansiejums, sovukuort 7,83% RA finansiejums. Rēzeknis Augstškola ar kompaktū infrastrukturys izvītuojumu Atbreivuošonys alejā 115 efektivi izmontuos resursus, samazynuos telpu uzturiešonys izdavumus, nūdrūšynuos kvalitativu studeju i pietnīceibys vidi. Jaunuos Inženeru fakultatus kūpejuo plateiba 4000 m² (t.sk. laboratoreju telpys 1190 m²; ekologejis i vidis aizsardzeibys, fizikys, elektrotehnikys, mehatronikys i cytys laboratorejis). Jaunuo studeju korpusa arhitekts ir Juris Mitenbergs (SIA “AB3D”).

RA studeju prorektore Angelika Juško-Štekele akcentej: “Mes asam regionala augstškola. Augstškolys spāks ir Latgolys regiona spāks. Latgalīši i Latgola vysod sevi ir paruodejuši kai cīši spieceigus i vitalus cylvākus. Itys spāks i vitalitate ir puorguojuse ari iz myusu augstškolu. Tuos saknis, regionalais sakņuojums, myusu kulturys identitatis tradicejis ari ir myusu leluokais spāks. Augstškola atsateista dinamiski i strauji. Tamā storpā asam nūstyprynuojuši materialū bāzi, izveiduojuši partnereibys teiklu i ar uorzemu teiklim, i vītejim uzjāmumim, i cytom augstškolom Latvejā. Tys nūzeimoj, ka asam pīteikami spieceigs spālātuojs jau na tik Latvejis, bet ari Eiropys mārūgā.”

 Rēzeknis Augstškolys jaunuos Inženeru fakultatis ākys atkluošona Atbreivuošonys alejā 115

PROGRAMA

13.00 – puļciešonuos pi jaunizcaltuos Inženeru fakultatis. Augstškolys vadeibys, vaļsts amatpersonu uzrunys. Karūgu paceļšona mastā.

13.40 – Inženeru fakultatis jaunuo korpusa apskate (grupuos pa 20 cylvāku)

Vareiba:

• redzēt prototipiešonys īkuortu darbeibu;
• apmeklēt kīmejis laboratoreju, ekologejis i vidis aizsardzeibys laboratoreju, fizikys, elektrotehnikys, mehatronikys i cytys laboratorejis;
• praktiski dorbuotīs elektrotehnikys, kīmejis, elektriskuos pīdzinis laboratorejuos, kai ari vāruot eksperimentus.

14.30 – lobūs vieliejumu laiks (1.11. telpā)