Nu saryusiejušu stīpļu, metala gultu, ritiņu disku, vacu orklu var tapt metala muokslys veiduojumi, kas nas sovu ideju i pīsaista viereibu. Tai daudzuos piļsātuos pasaulī, pasasokūt metaldizaina muokslinīkim, ir izveiduoti interesanti i saistūši vidis objekti.

Nu 14. leidz 19. juļam muoksla nu metala taps ari Rēzeknē, partū ka Rēzeknis Muokslys noma darbneicuos nūtiks Metala muokslys simpozejs. Ideja tū reikuot pīdar Rēzeknis Muokslys i dizaina vydsškolai (RMDV).

Simpozeja atkluošona 14. julī 13.30 Muokslys nomā, 18. novembra īlā 26, Rēzeknē.

Simpozejs nedelis garumā byus na tik objekta izveide  piļsātai, nu ari atvārtys rodūšuos darbneicys i lekcejis metala muokslā sevkuram interesentam. Rēzeknīšim, gostim, tūristim i žurnalistim byus vareiba redzēt dorbu tuo tapšonys procesā, īsavērt, kai rūnās muokslys dorbi nu metala, aizdūt vaicuojumus i sajimt atbiļdis nu profesionalu i talanteigu metalmuokslinīku.

Rodūšuos darbneicys vadeis Latvejā i pat Eiropys mārūgā pazeistami muokslinīki –  Latvejis Muokslys akademejis Metala dizaina katedrys vadeituojs Arvīds Endziņš i docents Andris Silapēters, magistrs Jēkabs Voļatovskis i Rēzeknis Muokslys i dizaina vydsškolys Metala izstruoduojumu dizaina izgleiteibys programys vadeituojs Norberts Kudiņš. Jī ari daliks sovu rūku pi vidis objekta tapšonys, tū veiduos kūpā ar školys audzieknim i absolventim, kuri ituo procesa laikā montuos jaunuos prasmis.

Juopībylst, ka pīmynātī muokslinīki, pīsaistūt ari studentus, ir pylnveiduojuši vairuoku Latvejis piļsātu vidi, pīmāram, Jākubpili, Aizkraukli, Siguldu. Jūs kūpeigī dorbi ir topuši daudzūs simpozejūs Latvejā i uorpus tuos.

Karteņā: RMDV studentu veiduotais metala dizaina objekts Muokslys noma pogolmā, Rūseņa dīna, 2014. g. apreļs. (Kartenis autore: Maija Upeniece)