Leivuonā svieteis piļsātys svātkus

Leivuonā svieteis piļsātys svātkus

Nu 17. leidz 19. juļam Leivuons aicynoj iz piļsātys svātkim. Itūgod svātku moto “Iz bezgaleibys spuornu pasaceļt!”, partū ka piļsāta svietej bezgaleibys godskuortu – 88 godus nu laika, kod Leivuonam pīškiertys piļsātys tīseibys.

Svātku īskaņā, catūrtdiņ, 17. julī pa dienu Leivuonā gasteis Vaļsts prezidents Andris Bierzeņš. Prezidents sasatiks ar dzeivuotuojim i nūvoda jaunīšim, kai ari apmeklēs Leivuona stykla muzeju i vīnu nu vodūšūs nūvoda uzjāmumu, augstūs tehnologeju kompaneju SIA “Z-Light”.

Catūrtdīnis vokorā piļsātys svātku īskaņā Leivuona nūvoda Kulturys centrā nūtiks svātku  atkluošonys vokora ekumeniskais dīvkolpuojums, kurā pīsadaleis vysu konfeseju muoceituoji. Piec dīvkolpuojuma kulturys centrā nūtiks Nakts rokkoncerts, kur goreiguos dzīsmis dzīduos Reigys Svātuo Jākuba katedralis kristeiguo rokgrupa “ExAnimo” (tulkuojumā nu latīņu volūdys – “nu dvēselis, nu sirds”).

I catūrtdiņ, i ari pīktdiņ, 18. julī, Latgolys muokslys i omotnīceibys centra saime gaideis zīdu rokstu veiduotuojus– organizacejis, uzjāmumus, interesentu grupys. Itūgod tradicionalais “zīdu viļņs” tiks veiduots, kuortojūt kompozicejis formuos, kas atbylstūši piļsātys svātku moto attāluos putynu spuornus.

Vokorā Leivuona piļsātys Tradiceju laukumā nūtiks sovejūs vokorsgrupys “Autobuss debesīs” koncerts. Eipašī gosti itymā vokorā byus leivuonīši – vijūļneica, dzīduotuoja Kristīne Kārkle-Puriņa, multiinstrumentalisti Edgars Kārklis i Gatis Valters, kai ari vokora vadeituojs Juoņs Auzāns. Uzastuos ari dzīduotuoja Paula Dukure i pianists, leivuonīts, kurs ir ari kikboksa čempions Otto Kovči. Iztureiguokī varēs turpynuot balu kūpā ar dīdžeju Bolūdi (Jākubpiļs Radeja 1).

Sastdīņ, 19. julī, Leivuonu svātkim mūdynuos motorizietais braucīņs (9.45), nu piļsātys stadionā vysys dīnys garumā nūtiks XV Sporta svātki ar devizi  “Mūstīs, celīs, sportoj”.

Dūmis ūļneicā jau nu 12.00 – sātys ražuotuoju, omotnīku i uzjiemieju tierdzeņš, bet nu 13.00 Zaļajā ūļneicā – Drūšeibys i spēļu ūļneica bārnim i jaunīšim, kur sevkuru aicynuos iz rodūšajuom darbneicom, rūtaļom, jautrom atrakcejom, byus policejis ekipiejuma paraugdemonstriejumi.

Pušdīņu laikā pi Latgolys muokslys i omotnīceibys centra nūtiks sirsneigī Bebeišu svātki, kū reikoj Leivuona nūvoda Dzymtsarokstu nūdaļa, kab sveiktu jaunūs vacuokus ar bierneņu pīdzimšonu. Latgolys muokslys i omotnīceibys centrs dorbuosīs leidz pat vokoram, byus vareiba bez moksys apsavērt ekspozicejis i Leivuona stykla muzeju, kai ari vāruot keramikys cepļa attaiseišonu.

Sovukuort  sportiskuokūs dzeivuotuojus nu 14.00 varēs aizraut Spākaveiru čempionats, kura vīns nu pūsmu sastdiņ nūtiks Leivuona školu stadionā.

Sastdīnis piecpušdīnē 15.30 Leivuonā tiks atkluots jau ūtrais dizaina sūleņš – Spararats, itūreiz automobiļa formā, kuru piļsātai duovoj uzjāmums “Leivuona biokīmiskuo ryupneica” (sūleņa autors – kaļvs Valērijs Konstantinovs, kurs izgatavejs ari “Izleigšonys sūleņu” Leivuonā).

Ticeigū tautu īprīcynuos Rēzeknis – Aglyunys diecezes veiskupa V.E. Jāņa Buļa vizitaceja 15.00 katuoļu bazneicā, kurys laikā īstyprynuošonys sakramentu sajims vairuoki desmiti Leivuona nūvoda bārnu i jaunīšu.

Piecpušdīnē  i leli, i mozi teik īlyugti iz Gaisa pūķu akceju “Laimeigais liduojums” pi Latgolys muokslys i omotnīceibys centra – sevkurs var tai pīsavīnuot ar pierktim voi poštaiseitim gaisa pūkim (tūs, storp cytu, varēs pagatavēt ari vīnā nu Bārnu ūļneicys rodūšūs darbneicu).

Sastdiņ sasasporoj ari vysi dzīduotuoji,  partū ka itamā dīnā Tradiceju laukumā nūtiks vīna nu vokaluo konkursa “Dzīšmu kari 2014” atlasis kuortu.  Informaceja par konkursu i dasasaceišona www.dziesmukari.lv, kai ari konkursa laikā.

Svātku golvonuos dīnys vokora īskaņā nūtiks Lelais svātku guojīņs nu kulturys centra iz Tradiceju laukumu ar nūsaukumu “Mes – nu spuornuotuos piļsātys”, pyrms tuo –Pecolli saimis “Burbuļu šovs”. Tradiceju laukumā tiks sveikts Leivuona Gūda pylsūņs 2014 – 11. Saeimys deputats, leivuonīts Juoņs Klaužs.

Sastdīnis vokors i nakts Tradiceju laukumā turpynuosīs ar koncertim i balu leidz pat reita gaismai kūpā ar “Slavanū Jersikys orkestri”, emocionali intelektualū pop-roka grupu “The Sound Poets”, Fēliksu Ķiģeli, Daini Skuteli ar grupu “Bel Canto”,  grupu “Krampis”. Naizpaliks ari Svātku uguņuošona pusnaktī.

Vaira informacejis: Leivuona nūvoda sātys lopā www.livani.lv.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]