Višku azara krostā nūtyka bārnu vidis nūmetne

Višku azara krostā nūtyka bārnu vidis nūmetne

Daugovpiļs nūvoda Višku pogostā nu 7. leidz 11. juļam nūtyka bārnu nūmetne “Loba dzeivuošona azarkrostā”. Nūmetnis golvonuo ideja beja paruodeit iudiņa – zemis mijīdorbuošonūs: kai saimnīkuošona lauku sātā ītekmej iudiņa objekta kvalitati.

Nūmetnē pīsadaleja 25 bārni nu Daugovpiļs, Preiļu, Vuorkovys, Viļānu, Jākubpiļs, Ikškilis nūvodu. Dalinīkim tyka ruodeitys i vuiceitys vairuokys praktiskys, lauku saimisteibā paveicamys i tymā pošā laikā – Latgolys laukim inovativys i vidis kvalitati paaugstynūšys metodis. Nūdarbeibys nūtyka par vysaidom temom, kurom beja veļteitys atseviškys dīnys – azaru dīna, zemis dīna i slynkuos duorzkūpeibys dīna.

Azaru dīnā nūmetnē gasteja Daugovpiļs Universitatis Geografejis katedrys docents Dāvis Gruberts i Ekologejis instituta pietneica Jana Paidere, kuri vadeja azara iudiņa izpieti i praktisku paraugu jimšonu Višku azarā – miereja azara dziļumu, iudiņa temperaturu vysaidūs dziļumūs, skuobekļa pīsuotynuojumu, iudiņa dzidreibu. Taipat ari bārnim tyka ruodeits, kai atpazeit vysaidus pīkrastis augus, izmontojūt augu nūteicieju.

Zemis dīnā beja tikšonuos ar Pīteri Paukšu, kurs izstuosteja ilgtspiejeigys saimnīkuošonys i resursu izmontuošonys principus, ruodeja videomaterialus ar pīmārim nu praksis. Itamā dīnā nūmetnis dalinīkim beja vareiba pasavuiceit pamatprasmis vysaidu tautys muzykys instrumentu (kūkle, stabule, ceitara, vijūle, bungys i cyti) spēlē i īsavuiceit tradicionalūs daņčus i rūtalis. Dīnys izskaņā bārni ruodeja prīšknasumus nūmetnis Talantu vokorā, kur beja sportiski paraudemonstriejumi, pošu raksteiti dzejūli i stuosti, dzīsmis i dejis.

Slynkuos duorzkūpeibys dīnā nūmetnis dalinīki gasteja Ilzis Mežnīcis permakulturys saimisteibā i vuicejuos vairuokys prasmis, kab varātu “slynkai” saimnīkuot, – hugeldūbu i komposta veiduošona, nazuoļu pesto pagataveišona, uorstnīceibys augu atpazeišona i īvuokšona. Breivpruoteigais nu Rumanejis, senejūs byuvnīceibys prasmu entuziasts Aleksandrs Tudose demonstrēja muola sīnys veiduošonu, dūdūt vareibu leidzadorbuot ari interesentim.

Piec nūmetnis vairums dalinīku atzyna, ka sajimtuos zynuošonys i prasmis raudzeis izmontuot kasdīnā, pīmāram, par “nazuoļu” pesto gataveišonu, atkritumu šķiruošonu i cytom. Bārni i jūs vacuoki ir izsacejuši vielmi i vajadzeibu piec leidzeigu nūmetņu ari iz prīšku.

Nūmetni “Loba dzeivuošona azarkrostā”” organizēja bīdreiba “Kulturys studeja “Speiga”” ar Latvejis vidis aizsardzeibys fonda finansiejumu i Višku pogosta puorvaļdis atbolstu. Nūmetnis dalinīkus i darbinīkus sirsneigi uzjēme gostu sāta “Viškazars”.

Informaceju sagataveja: Vita Briška, nūmetnis vadeituoja