Raidejumā dzejnīks Valentins Lukaševičs ļausīs sova studenta, aktera, kūktieļnīka, pedagoga i itūreiz ari gida pīduovuotajam braucīņam pa Latvejis austrumu pīrūbežu. Māris Susejs nazkod bejs akters Daugovpiļs teatrī, itūšaļt ir muokslys pedagogs vairuokuos Latvejis pīrūbeža školuos, jauns cylvāks, kurs īsastuoj par Latgolys etniskuos, kulturviesturiskuos identitatis saglobuošonu, kurs muok aizrauteigi stuoseit par pīdzeivuotū, kurs secynoj i aicynoj īsavērt regiona patīsajuos vierteibuos. Itymā raidejumā i ari turpynuojumā piec nedelis Māris aizvess iz Indrys Muokslys i muzykys školu, redzēsim, cik nacionali kruosaina ir juo audziekņu klase i izpratne par muokslu, pagasteisim vystuoluokajā austrumu vydsškolā i dzeļžaceļa stacejā, kas atsarūn Indrā. Redzēsim pīrūbeža daiļomotu meistaru atškireigūs deču rokstus ausšonys cehā “Indra’’. Ceļš aizvess iz Pīdruju, kur tik Daugova škir nu Boltkrīvejis piļsātys Drujis, redzēsim vīntuļūs staraveru cīmus, kuru koloritu uztversim caur dekorativajom tradicionalajom kūka lūgu rūtim, kūpā baudeisim skaistu Latgolys vosorys ainovu  i dastuosim pi Daugovys Kruoslovā.