Aicynoj daleitīs ar personeigim stuostim par dzīsmem

Aicynoj daleitīs ar personeigim stuostim par dzīsmem

Rakstnīceibys i muzykys muzejs aicynoj sabīdreibu īsasaisteit tūpūšuos ekspozicejis “Dziesma” veiduošonā, stuostūt par dzīsmis i dzīduošonys nūzeimi sovā dzeivē. Daugovpiļs dzeivuotuojus muzeja darbinīki īlyudz iz sasatikšonu 30. julī, 13.00 Latgolys Centraluos bibliotekys Periodikys laseitovā (Reigys ūļneicā 22A), kur sevkurs aicynuots pastuosteit par kaidu eipašu dzīsmi voi ar dzīduošonu saisteitu nūtikšonu sovā dzeivē.

Intervejis nūtiks napīspīstā gaisūtnē pi kopeja voi čaja. Dzeivuotuoju stuostus izmontuos, veidojūt Rakstnīceibys i muzykys muzeja ekspoziceju “Dziesma”, kuru paradzāts atkluot 2016. goda pavasarī reizē ar rekonstrukceju pīdzeivojušū muzeja āku Reigā, Piļs laukumā 2.

Pamatojūtīs iz dzīsmis i dzīduošonys tradicejis nūzeimeibu Latvejis kulturā, ekspoziceja īcarāta kai muzeja duovona Latvejis Republikys 100 godu jubilejā. Ekspozicejis struktura tiks veiduota, Latvejis dzīšmu viesturi stuostūt caur myusu dīnu cylvāka dzeivis ritiejumu. Leidzeigi kai Krišjāņa Barona tautysdzīšmu kuortuojumā, ekspozicejis ītvorūs cylvāks pīdzims, augs, izīs cauri nūteiktai socialajai pīredzei, īaugs sovys kūpīnys montuojumā i paliks jau par nuokamuos paaudzis bāzi. Partū šudiņdīnys Latvejis dzeivuotuoju īsaiste ekspozicejis izveidē ir cīši napīcīšama.

Daleitīs sovā pīredzē īspiejams vysaidūs veidūs, na tik sasateikūt ar muzeja darbinīkim kluotīnē. Aptauja pīejama škārsteiklā. Leidz 30. juļam izdrukuotys anketys īspiejams aizpiļdeit Latgolys Centralajā bibliotekā.

Sevkurs, kuram ir personeigs stuosts par eipašu nūtykumu, kurā lela nūzeime bejuse kaidai dzīsmei, aicynuots ari sasazynuot ar muzeju (aivars.madris@rmm.lv; 67221956).

Ar aptauju i interveju paleidzeibu raudzeisim kūpeigi nūskaidruot, cik pamatuoti ir taidi tradicionali (ari klišejiski) apgolvuojumi kai: latvīši ir dzīduotuoju tauta; latvīšu kori ir Latvejis Nokia; dzīsmuotuo revoluceja ļuove atjaunuot Latvejis vaļstiskū naatkareibu i cyti.

Ar dzīsmis viesturis interpretacejis storpnīceibu RMM ekspoziceja dūs īskotu na tik diveju profesionalu muokslys nūzaru – rakstnīceibys i muzykys – atteisteibā, nu ari veicynuos diskuseju par nacionaluos identitatis vaicuojumim.

Print Friendly, PDF & Email

Kalenders

May
29
Tre
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
May 29 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Grupys “Saucējas” koncerts i daņ... @ Reiga
Grupys “Saucējas” koncerts i daņ... @ Reiga
May 29 @ 19:00 – 21:00
Latvejis Kulturys akademejis tradicionaluos dzīduošonys grupa “Saucējas” trešdiņ, 29. majā, 19.00 aicynoj is koncertu Āgenskolā Pāvula Jurjāna muzykys školys estradē, Bolūžu īlā 24. 
May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]