Juoņs Streičs atzeits par vīnu nu Latvejis izciluokajom personeibom

Juoņs Streičs atzeits par vīnu nu Latvejis izciluokajom personeibom

Latvejis Instituta i televizejis kanala “History” kūpeigi reikuotajā dzeivuotuoju aptaujā, kurā pīsadaleja gondreiž 5000 bolsuotuoju, par Latvejis izciluokajom personeibom atzeiti komponists Raimonds Pauls, muokslineica Džemma Skulme, dzejneica Māra Zālīte, akademiks Jānis Stradiņš, bejušuo Latvejis prezidente Vaira Vīķe-Freiberga, teatra režisors Alvis Hermanis, kinorežisors Juoņs Streičs, dzejnīks Jānis Peters, bejušais Latvejis hokeja izlasis vuortsorgs Artūrs Irbe, kai ari kulturys mecenati Boriss i Ināra Teterevi.

Laikā nu 30. juņa leidz 16. juļam sevkurs interesents varēja bolsuot aptaujā “Kurys ir Latvejis myusu dīnu izciluokuos personeibys, kas veidoj nuokūtnis viesturi?”, izavielejūt sovus favoritus zynuotnē, kulturā, sportā, politikā i uzjiemiejdarbeibā.

100 personeibu saroksts tyka sastateits, jemūt vārā jūs reputaceju, davumu tautsaimnīceibys izaugsmē, konkretys nūzaris izveidē voi atteisteibā, inovaceju īvīsšonā i Latvejis tāla pozitivys atpazeistameibys veiduošonā. Aptaujis rezultati par 60% beja atkareigi nu bolsuotuoju izvielis, bet atlykušī 40% – nu žūrejis.

 

Print Friendly, PDF & Email