Rēzeknis piļsātys svātki “Jūra līdz ceļiem!”

Rēzeknis piļsātys svātki “Jūra līdz ceļiem!”

Nu 1. leidz 3. augustam Rēzekne – piļsāta Latgolys sirdī – svinēs 729. dzimšonys dīnu, i itūgod svātku moto ir “Jūra līdz ceļiem!”, īzeimejūt i nūtykušū Jiurys spāku flotis krosta apsardzis patruļkuģa “Rēzekne” īlaisšonu iudinī, i Rēzeknis izaugsmi, pozicionejūt nūstuoju, ka vyss ir īspiejams, ka viņ cīši grybam sovu piļsātu atteisteit.

Tymā pošā laikā svātku moto ir atrūnamys variacejis, kas aicynoj vaicuot i atrast vēļ citys jiurys i ceļu nūzeimis, kab atkluotu poši sovu dūmu i jiutu dziļumu – voi ībrīnūt jiurā da ceļu īsadūmojam par tim celim, pa kurim var aizīt da jiurys? Voi, asūt Rēzeknis upis krostā, sajiutam Latgolys jiurys – Rāznys azara – svaigumu i sadzieržam, kai upe pa sovim celim aiztak leidz Baļtejis jiurai, kur patrulej kugis “Rēzekne”? Sevkurs Rēzeknis piļsātys svātkūs varēs pīdzeivuot vysvysaidys sajiutys i izbaudeit i performancis i koncertus, i aktivi īsasaisteit rodūšajuos darbneicuos.

Rēzeknis svātki 1. augustā īsasuoks vydslaiku nūskaņuos Rēzeknis piļskolnā, kur nu 18.00 viesturis rekonstrukceju klubi nu Vitebskys, Pleskovys, “Heiligenberg”, “Rodenpois” i “Ugunszīme” demonstrēs i vysaidys omotu prasmis, i vydslaiku ceinis muokslu i aicynuos īsavērt apmetnis sadzeivē. Muzykali varēs baudeit vydslaiku muzykys grupys “OBSCURUS ORBIS”,  deju kūpys “Dziga” i grupys “ElektroFolk” uzastuošonu.

2. augustā nu 12.00 piļsātā vaļdeis jiurys nūskaņa, gasteis i Jiurys spāku flotis krosta apsardzis patruļkuģa P-09 “Rēzekne” komanda, i 2. zemissardzis nūvoda i Vaļsts rūbežsardzis koledžys komanda, kuru vadeibā byus vareiba pīsadaleit vysaiduos rodūšajuos darbneicuos – mozī varēs poši izveiduot sovu kugeiša modeli i īsasaisteit duorgumu vaicuošonys spēlē, lelī – sasaceņst enkuru ceļšonys, rūku lausšonuos voi viervis viļkšonys saceņseibuos, paradzāts ari zuoboku svīsšonys konkurss i izveiceibys stafete, kas praseis i veikleibu, i ari sovstarpiejū komandys sadarbeibu, kas cīši nūzeimeiga ir ari struodojūt iz kuģa.

Svietejūt Latvejis armejis i Rēzeknis 9. kuojinīku pulka 95. godadīnu, piļsātys svātku ītvorūs byus vareiba apsavērt karaveiru, rūbežsorgu i zemissorgu īrūčus, vāruot vysaidus paraugdemonstriejumus i prezentacejis, mīluotīs lauka kuknē i baudeit Zemissardzis pyutieju orkestra i Vaļsts Rūbežsardzis koledžys kora koncertu.

15.00 Latvejis Muokslys akademejis Latgolys filialis studentis Grieta Butjankova, Anastasija Bikova i grupa “Time Beat”, kuri apsavīnuojuši kūpeigā komandā “From Silence” pīduovuos skateituojim performanci aba gleznīcisku puordūmu spīgeli ar muzykalū pavadejumu “Jūra līdz ceļiem – Domās līdz ausīm – Ceļi virs domām”, aicynojūt īsadzilinuot muokslinīka rodūšajā procesā i vāruot, kai dūmys realizejās iz audakla.

Piec aktivys dorbuošonuos 18.00 Latgolys viestnīceibā GORS byus vareiba baudeit koncertuzvadumu “Pa dzintara ceļu…” (beleti 8,00–14,00 €), kurā pasauļa muzykys ansamblis “TālaMana”, tuo sastuovā muzicej Laila Saliņa (Latveja/ASV), DžimsMatus (Pūleja/ASV), Šeins Šanahāns (Īreja/ASV) i Timo Vēnenens (Sūmeja), aizvess aizraujušā muzykali teatralā ceļuojumā pa legendom apveitajim dzintara tierdznīceibys celim.

20.00 rēzeknīši i piļsātys gosti teik aizynuoti uzgavilēt svārku guojīņa komandom, kas itūgod  sovūs prīšknasumūs i vizualajūs ītārpūs demonstrēs jiurys temu i dūsīs drupeit garuokā guojīnī nakai paguojušajā godā – pa Atbreivuošonys aleju nu Kr.Valdemāra ūļneicys leidz Festivala parkam. Kab skateituojim guojīņa vāruošona byutu interesantuoka, ar guojīņa dalinīkim īpazeistynuos muziki Mārtiņš Ruskis i Mārtiņš Jātnieks, kurus piec tam varēs dzierdēt ari vokora koncertā. Iz reizis piec guojīņa Festivala parkā turpynuosīs vokora koncertprograma, kurā eipaši ar aplausim i ovacejom tiks sveikti ituo gods “Latvejis šlageraptaujis 2014” uzvarietuoji – grupa “GINC UN ES”. Vokora programys muzykalajā koncertuzvadumā “Gadalaika” varēs ļautīs treisdimenseju sajiutom i izbaudeit latvīšu i pasauļa popmuzykys, rokmuzykys, džeza i klasiskuos muzykys skaņdorbus popularu muokslinīku izpiļdejumā, kū papyldynuos magiskys gaismys spēlis, kruošņys videoprojekcejis, aizraujūši specefekti i naaizmierstamys sajiutys, dūdūtīs mīlesteibys ceļuojumā cauri četrim godalaikim. Kai īrosts, sastdīnis svātku programys nūslāgumā tiks baudeits svātku salūts.

3. augustā 11.00 suoksīs tradicionaluo bārnu rateņu paruode pa Atbreivuošonys aleju nu pīminekļa “Vienoti Latvijai” leidz Festivala parkam, kur sekuos koncertprograma bārnim i dorbuosīs rodūšuos darbneicys i atrakcejis. Piļsātys svātki izskanēs ar tradicionalū Storptautiskuo akordeonistu plenera “Rēzekne 2014” nūslāguma koncertu Latgolys viestnīceibā GORS.

Informejam, ka piļsātys svātku guojīņa i bārnu rateņu paruodis laikā, t.i., sastdiņ, 2. augustā, nu 19.30 ledz 21.00 tiks slāgta transporta kusteiba Atbreivuošonys alejā, pūsmā nu Kr.Valdemāra ūļneicys leidz Piļs ūļneicai, i svātdiņ, 3. augustā, nu 10.00 leidz 12.00 – Atbreivuošonys alejā nu N.Rancāna ūļneicys leidz Festivala parkam Piļs ūļneicā. Autovadeituoji guojīņu laikā teik aicynuoti byut saprūtūši i īcīteigi.

 

 

Print Friendly, PDF & Email

Kalenders

May
25
Sai
19:00 Grupys “Raxtu Raxti” i “Sinfonie... @ koncertzāle "Lielais Dzintars"
Grupys “Raxtu Raxti” i “Sinfonie... @ koncertzāle "Lielais Dzintars"
May 25 @ 19:00 – 21:00
Līpuojis koncertzālis pavasara sezonys nūslāgumā iz leluos skotivis varēs pīdzeivuot eipašu mageju, kū veiduos mejīdarbeiba tautys i akademiskuos muzykys vydā – grupa “Raxtu Raxti” i kamerorkestris “Sinfonietta Rīga” dirigenta Normunda Šnē vadeibā. Kūpeigajā koncertprogramā skanēs[...]
19:00 Leluo Latgolys zaļumballe @ Lūznovys muiža
Leluo Latgolys zaļumballe @ Lūznovys muiža
May 25 @ 19:00 – 23:00
Zaļumballi īskandynuos grupa “TRIO Rāzna +”, bet vokora ūtrajā daļā apmaklātuojus energiski i skaneigi izklaidēs grupa “Stradivari”.   Īīšonys moksa 4,00 eiro.   Biletis “Biļešu paradīzes” kasēs i Lūznovys muižā.