Atbiļdeiba i sirdsdegsme par Latgolu, sovu nūvodu, ir tys dzynuļs, kas radejs i turpynoj tradiceju apmeklēt latgalīšu školuotuoju i studentu vosorys kursus “Vosoruošona”.

“Vosoruošona 2014” dalinīkus – vosoruotuojus – itūgod gostūs uzjēme Baļtinovys vydsškola 27.-31.julī. “Vosoruošona” aizasuoce 2000. godā Rogovkā, padorūt ituo gods seminaru par 9. sasatikšonuos reizi. Seminars kotru reizi nūteik cytā rajonā, puļcejūt apmāram 30 dalinīku – latgalīšus i latgalīšu draugus.

Verūtīs iz Baļtinovā sabraukušūs vosoruotuoju, puorjem dyžani sylta sajiuta. Kūpā saguojuši kai eistyni “Vosoruošonys” veterani, kas kursus apmeklējuši vysys reizis, tai ari jauni i seminaru vēļ napīredziejuši latgalīši, puorstuovūt vysaidys Latvejis izgleiteibys īstuodis.

Kūpā tyka apmaklātys Latvejis Universitatis, Rēzeknis Augstškolys i cytu specialistu vadeituos lekcejis par latgalīšu rokstu volūdu, folkloru, nūvodvuiceibu i kulturviesturi, skateitys vuiceibu dokumentaluos kinys i pīsadaleits rodūšajuos darbneicuos. Kotrs vosoruotuojs seminara beiguos sajēme aplīceibu par naformaluos izgleiteibys apgiušonu programā “Latgales kultūrmantojuma apguve skolā”.

Pats par sevi saprūtams – sadarbeiba, pīredzis i zynuošonu apmaiņa nanūteik viņ lekceju laikā. Jau par tradiceju palykušys taidys aktivitatis kai ekskurseja pa apleicīni, kūpeiga bolsu i dejis sūļu skandynuošona, talantu šovs, ikreita ceļšonuos i reita rūsme, spļotku, ospruoteibu i anekdotu byrdynuošona.

Itūgod vosoruotuoji ari atzeimuoja Annys dīnu kūpā ar baļtinovīšim, Annu Rancāni i Baļtinovys teatra “Palādas” izruodi “Ontans i Anne”.

Kūpā saīšona “Vosornuošonā” dūd na tik jaunys zynuošonys i materialu puordūmom. Kūpā byušona, kūpeiga atsapyusšona dūmubīdru vydā dūd spāku i motivaceju dorbuotīs, radeit, i paleidzēt augt myusu volūdai i Latgolai.

Vosoruošona – tei ir dzīduošona, doncuošona, vuiceišona, radeišona, smaideišona … vysys lobuokuos “šonys” 4 vosorys dīnuos!

Iz sasatikšonu nuokušajā – nu jau desmitajā – “Vosoruošonā”!

Roksta autore: Daiga Miščenko,“Vosoruošonys 2014” dorba grupys dalineica