Rēzeknē nūtiks storptautiskais kinofestivals “OpenPlace”

Rēzeknē nūtiks storptautiskais kinofestivals “OpenPlace”

Nu 16. leidz 20. augustam rēzeknīšus i piļsātys gostus otkon prīcynuos Storptautiskais eiskinu festivals “OpenPlace”. Koncerti, eiskinu skatis, kino seansi, sasatikšona ar muokslinīkim, kino i veina vokori iz jumta terasis i cytys nūtikšonys pīpiļdeis pīcys dīnys ilgū kinofestivala programu, kura īzeimoj rītumu, austrumu i vysa vydā latgaliskuo sasatikšonu.

Storptautiskais eiskinu festivals “OpenPlace” aizasuoce 2013. godā ar mierki popularizēt Eiropys jaunuokuos i lobuokuos eismetražys kinys, veicynuot Latvejis kinematografa atteisteibu, kai ari veiduot jaunu i talanteigu kino nūzaris profesionaļu pīredzis apmaiņu i sadarbeibu. Taipat kinofestivala “OpenPlace” aizdavums ir veicynuot Rēzeknis kai Latgolys kulturys i turisma centra atpazeistameibu i kinematografistu sadarbeibu Baļtejis regiona i Eiropys leimenī. 2014. godā kinofestivalā uzsvors teik lykts iz jaunūs kino režisoru vītu, dūt vareibu paruodeit i pīruodeit sovus spākus storptautiskā leimenī.

Itūgod kinofestivala konkursa programā pīsadaleis 27 eiskinys, kū veiduojuši jaunī režisori nu Latvejis, Lītovys, Igaunejis, Pūlejis, Dānejis, Vuocejis i Krīvejis. Konkursa eiskinu skatis nūtiks treis dīnys nu 17. leidz 19. augustam. Jaunūs režisoru veikumu izviertēs kompetenta žūreja, kurys sastuovā ir vairuoki kino profesionali:kino režisore i pasnīdzieja Laima Žurgina, Baļtejā leluokuo storptautiskuo eiskinu festivala “2ANNAS” īprīkšejuo producente Amanda Boka, kino i video muokslys pasnīdzieja Agnese Ivane i kino konsultants, vīns nu Ūmeo storptautiskuo kinu festivala (Zvīdreja) dybynuotuoju Toms Palmens (Thom Palmen).

“OpenPlace” konkursa programu uzvarātuoji sajims bolvys nu festivala atbaļsteituoju. Konkursa programys ītvorūs tiks pīškiertys ari eipašuos simpateju bolvys (festivala “OpenPlace” statuetis) i atzineibys roksti. Festivala lobuokuo kina sajims Grand Prix 1000 € vierteibā.

Paraleli konkursa programai, kinofestivala laikā tiks pīduovuota ploša kulturys programa – konkursa atkluošonys i nūslāguma koncerti ar vītejūs i uorvaļstu gostu pīsadaleišonu, sasatikšonys piecpušdīnis ar īvāruojamim kino i teatra akterim, uorpuskonkursa kinu programa, kurā tiks izruodeitys gūdolguotys i pādejūs godu lobuokuos uorvaļstu kinys, par pīmāru, “Geografs nūdziers globusu” (Географ глобус пропил), “12 godu verdzeibā” (12 Years a Slave) i cytys. Ituo gods festivala gosti ir Juoņs Streičs, Mirdza Martinsone, Aristarhs Ļivanovs (Аристарх Ливанов), Valentina Talizina (Валентина Талызина), Sergejs Šakurovs (СергейШакуров) i cyti.

Kinofestivala pasuokumi breivi pīejami sevkuram interesentam. Beleti nūpierkami i Latgolys viestnīceibys GORS kasē, i “Biļešu Paradīze” beletu teiklā. Vaira par festivala programu var izzynuot ite.

 

Print Friendly, PDF & Email

Kalenders

May
29
Tre
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
May 29 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Grupys “Saucējas” koncerts i daņ... @ Reiga
Grupys “Saucējas” koncerts i daņ... @ Reiga
May 29 @ 19:00 – 21:00
Latvejis Kulturys akademejis tradicionaluos dzīduošonys grupa “Saucējas” trešdiņ, 29. majā, 19.00 aicynoj is koncertu Āgenskolā Pāvula Jurjāna muzykys školys estradē, Bolūžu īlā 24. 
May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]