Kuorsovys nūvoda Malnovā nūteik tierdzeņš, kū labi var saleidzynuot ar Kolncīma kvartala tierdzeņu, prūtams, na tik daudz tierguotuoju, na tik daudz apmaklātuoju, tok rūseiba i, kas byutiskai, nūvodam rakstureiguo kolorita dieļ, tys kaidā topā byutu viertiejams ar leluokū uobeļu skaitu.  Ari Latgolys apceļuotuoji nu Reigys tī bauda smolku branču,  īpierk lauku lobumus i kanneņā iz Reigu vad Latgolys lauku aļteņu. Raidejums apsastuoja pi tierguotuojis, kura gaumeigi safasietus pīduovuoja vysaidu zīdu lauku čajus. Dzejnīks Valentins Lukaševičs  pīkryta aicynuojumam apsavērt, kai aug Annys Dančys čaju augi juos sātā Annys muižā Saļņovys pogostā.

Annys Dančys mama i baba  labi zynuojušys augu uorstnīciskuos īpašeibys, tys radejs vieliešonūs vuiceitīs par uorsti. Tok dzeivē saguojs izavuiceit par agronomi, izgleiteiba paleidz īkūpt sovu uorstnīceibys augu duorzu, pareizi tū kūpt i laikā nūvuokt. Itymā “Cytaidi latviskais” stuostā byus vareiba izzynuot, cik vīnkuoršys lītys var byut nūdereigys, cik daudz puorsteidzūša pošai Annai ir īvuicejuse doba, cik veļdzejūšs var byus silts čajs ari tik korstā vosorā kai itei.