Daugovpiļs Universitate ar kotru godu palīk aktivuoka i myusdīneiguoka, studentim paverūt leluokys izvielis i izaugsmis īspiejis. Tū pīruoda ari jaunizcaltais Dzeiveibys zynuotņu i tehnologeju korpuss, kas svineigi tyka atkluots 22. augustā.

Kluotyn Daugovpiļs Universitatis vuiceibu korpusam Paruodis īlā 1 izcalta jauna i myusdīneiga āka – funkcionala vuiceibu i dorba vide. Tei byus šudiņdīnys nūstuodnem atbylstūšu zynuošonu i jaunu tehnologeju vuiceišonuos i izpietis vīta.

“Mums pīdar tik daudz,” ar itaidim zeimeigim vuordim suocēs Daugovpiļs Universitatis Dzeiveibys zynuotņu i tehnologeju korpusa atkluošona.

Pasuokumā  gostus uzrunuoja LR Izgleiteibys i zynuotnis ministrejis parlamentarais sekretars Andis Geižāns,  LR aizsardzeibys ministrs Raimonds Vējonis, Daugovpiļs piļsātys dūmis prīšksādātuojs Jānis Lāčplēsis, Daugovpiļs Universitatis rektors, akademiks Arvīds Barševskis i  SIA “Latvijas Energoceltnieks” vaļdis prīšksādātuoja padūmnīks Pēteris Dzirkals.

Izgleiteibys i zynuotnis ministrejis parlamentarais sekretars Andis Geižāns sovā uzrunā izsaceja cereibu, ka jaunais Daugovpiļs Universitatis Dzeiveibys zynuotņu i tehnologeju korpuss byus par vīnu nu Daugovpiļs vizitkartem.

Daugovpiļs Universitatis rektors, akademiks Arvīds Barševskis uzsvēre: “Jaunais Dzeiveibys zynuotņu i tehnologeju korpuss byus vīns nu modernuokajim studeju i pietnīceibys korpusim Latvejā, ar cīši duorgu i unikalu apreikuojumu.”

Uzrunojūt gostus, A. Barševskis izsaceja ari cereibu, ka nuokamajā plānuošonys periodā izadūs pīsaisteit vajadzeigū finansiejumu, kab ļautu talanteigajim studentim, kuri izstruodoj kvalitativus zynuotniskūs dorbus, turpynuot struoduot i atteisteit zynuotni Daugovpiļs Universitatē.

Rektors pasasaceja vysim projekta topšonā i realizacejā īsaisteitajim darbinīkim par miļzeigū īguļdejumu Daugovpiļs Universitatis infrastrukturys, pietnīceibys i vuiceibu vidis atteisteibā.  Pateiceibys roksts tyka padūts SIA “NAMS” par veiksmeigim i inovativim tehnologiskajim rysynuojumim Dzeiveibys zynuotņu i tehnologeju korpusa projektā i SIA “Latvijas Energoceltnieks” par byutisku īguļdejumu DU infrastrukturys atteisteibā, veicūt jaunuo korpusa byuvnīceibu.

Dzeiveibys zynuotņu i tehnologeju korpusu īsvieteja Rēzeknis – Aglyunys diecezis veiskups Juoņs Buļs i dažaidu konfeseju prīsteri.

Gosti īsapazyna ar jaunuo korpusa laboratorejom i studeju telpom.

Izgleiteibys i zynuotnis ministrejis Vaļsts sekretare Sanda Liepiņa nūruodeja, ka jaunuo korpusa atkluošona byuteibā nūruoda ceļu, kas augstuokajai izgleiteibai i zynuotnei byutu ejams Latvejis augstškoluos, kai ari izsaceja cereibu, ka kotrā nu zynuotniskajim laboratoreju kompleksim atsateisteis zynuotniskuos grupys, kuruos dorbuosīs ari studenti, kas nuokūtnē  struoduos Latvejis tautsaimnīceibā, veiduos uzjāmumus, kas sovā darbeibā izmontuos jaunuokūs zynuotnis sasnāgumus.

Jaunū korpusu atzineigai nūviertēja Augstuokuos izgleiteibys, zynuotnis i inovaceju departamenta Vaļsts sekretara vītneica – departamenta direktore Agrita Kiopa, uzsverūt faktu, ka ari leidz šam Daugovpiļs Universitatis pietnīceibys laboratorejis ir sajāmušys augstus viertiejumus.

Lobus vuordus i nūvieliejumus izsaceja Latvejis augstuokūs izgleiteibys īstuožu rektori, Latvejis Zynuotņu akademejis,  pošvaļdeibu  i Saeimys deputati.

Jaunuo korpusa telpuos sovu dorba vidi jau īkuortuojuši  kīmejis, fizikys, kvartarvidis, hidroekologejis, biotehnologejis, histologejis i cytu vuiceibu laboratoreju pietnīki i vuiceibspāki. Jau nu septembra jaunajā vuiceibu korpusā vuiceisīs asūšī i tūpūšī fizikys, kīmejis i biologejis studenti, tymā dorbuosīs instituti i pietnīceibys centri, daudzuos dobyszynuotņu laboratorejis, kurys vuiceibu procesā  byus vajadzeigys ari fizioterapeitim,  informacejis tehnologeju  studentim  i školuotuojim.

Myusdīneigais Dzeiveibys zynuotņu i tehnologeju korpuss izcalts Eiropys Regionāluos atteisteibys fonda atbaļsteituo projekta “Daugovpiļs Universitatis studeju programu kvalitatis uzlobuošona i vidis pīejameibys nūdrūšynuošona” ītvorūs.