Karīnys Ludboržys izstuode Latgolys Kulturviesturis muzejā

Karīnys Ludboržys izstuode Latgolys Kulturviesturis muzejā

Leidz 28. septembram Latgolys Kulturviesturis muzejā (Atbreivuošonys alejā 102, Rēzeknē) apsaverama jaunuos muokslineicys Karīnys Ludboržys  izstuode “Pakāpiens II”, kas atkluoj autoris leidz šam paveiktū vierzeibā iz prīšku pa pakuopīņam preteimā profesionalai piļneibai.

Itūšaļt jaunuo muokslineica studej gleznīceibu I. Repina vuordā nūsauktajā Sanktpīterburgys Muokslys akademejā, i itei jau ir ūtruo Karīnys Ludboržys dorbu izstuode taišni Latgolys Kulturviesturis muzejā. Ari itūreiz izstuode “Pakāpiens II” ir nūzeimeiga sasatikšona ar draugim i školuotuojim dzymtajā piļsātā Rēzeknē pyrms braukšonys iz Sanktpīterburgu, kab turpynuotu gleznīceibys studejis.

Karīna Ludborža (1990) – Sanktpīterburgys Muokslys akademejis studente – jau bārnu muokslys školā suokuse sovu rodūšū ceļu i turpynuojuse tū muokslys vydsškolā sovā dzymtajā piļsātā Rēzeknē. Niu, vuicūtīs sābru vaļstī, K. Ludborža jau trešū godu Rēzeknē reikoj personalizstuodis.

Autore atzeist, ka itamā izstuodē īkļautajūs dorbūs jei ir pīsavārsuse vysaidu tautu kulturu izzynuošonai i attāluošonai. Vysvaira autoris ocu skatīņs aizagivs afrikaņu kulturā – naparosta afrikaņu tārpu i tālu dekorativitate i mums nepīrostuo Afrikys zemis kolorita ekspresivitate.

Muokslineica atzeimoj, ka naaizmirst ari par sovu dzimtini, partū ka izstuodē var redzēt ainu nu latvīšu nacionaluos vierteibys – A. Pumpura eposa “Lāčplēsis”. Ari vuiceibu uzstuodejumi gleznuošonā ir naatjemama sastuovdaļa muokslineicys profesionalajā izaugsmē, taipat muokslineicys dorbi ir sastūpami lītiškajā muokslys nūvierzīnī – jau nu 2009. goda jei veidoj logotipus i afišys Zanis Ludboržys akordeonistu pleneram i Zanis Ludboržys muzykys školai, ir darynuojuse vitražys muzykys školys ākai.

Izstuode attaiseita:

Ūtardiņ, trešdiņ, catūrtdiņ, pīktdiņ 10.00-17.00

Sastdiņ 10.00-16.00

Svātdiņ, pyrmūdiņ – slāgta

Īīšonys moksa izstuodē: školānim, studentim– 0,50 €, pīaugušajim– 0,80 €, pyrmsškolys vacuma bārnim – īīšona breiva

Karteņā: Karīna Ludborža. Glezna “Sniegs” – nu autoris arhiva.

Print Friendly, PDF & Email

Nūtikšonu kalendars

Sep
29
Cat
15:00 Viesturis šaļteņu pītura “Latvij... @ Latgolys Kulturviesturis muzejs
Viesturis šaļteņu pītura “Latvij... @ Latgolys Kulturviesturis muzejs
Sep 29 @ 15:00 – 17:00
Itūšaļt Latvejā ir pyrma vieliešonu laiks, kod pylsūni lem, par kuru nu deputatu kandidatu sarokstim atdūt sovu bolsu. Ari pyrma 100 godu 1922. goda 7. i 8. oktobrī riezeknīši, kai ari vysys Latgolys i Latvejis[...]
Sep
30
Pīk
11:30 Saruna par Pēteri Martinsonu @ tīšsaistē
Saruna par Pēteri Martinsonu @ tīšsaistē
Sep 30 @ 11:30 – 13:00
Saruna par Pēteri Martinsonu @ tīšsaistē
J. Soikāna Ludzys muokslys škola aicynoj pīsasaceit iz seminaru, kurā Imants Klīdzējs (Mg.art, LMA doktorants, Salacgreivys muokslys školys direktors) stuosteis par muokslinīku, keramiki, arhitektu Pēteri Martinsonu. Pīsasaceit var ITE.