6. septembrī 12.00 Bolvu Sakraluos kulturys centrā tiks atkluota muokslinīka Pītera Džigura 70. dzeivis jubilejai veļteituo gleznu i grafikys dorbu izstuode “Sirdī dziesmas lai skan”.

Atzeimojūt sovu 70. dzeivis jubileju, muokslinīks Pīters Džigurs sareikuojs ceļojūšū personalizstuodi, kas prīcynuojuse skateituojus Leivuonā, Preiļūs, Ludzā, Rēzeknē, Modyunē. Niu kuorta daguojuse Bolvim, kur paradzāts izstuodis ceļuošonys tūris nūslāgums ar autora pīsadaleišonu.

Pītera Džigura muoksla ir juo dvēselis dzīsme, kū muokslinīks ļaun sadzierdēt sevkuram caur sovim grafikys dorbim. Smolki konstruktivuos kompozicejis izaug nu autora dūmys dziļumu, kuortojās i centriski, i asimetriski, ītverūt myužeibys i pasauļa simbolus, atspūguļojūt cylvāka sapynus, suopis i prīcu radeišonā i mīlesteibā.

Par muokslys byuteibu Pīters Džigurs soka tai: “Muoksla ir dvēselis šaļts arhitektura…”